سری لنکا کے مسلمان رواں سال حج کی سعادت سے محروم

🗓️ 3 جون 2022

سچ خبریں:سری لنکا میں آزادی کے بعد سے سب سے زیادہ معاشی بدحالی ہونے کی وجہ سے اس ملک کے مسلمان اس سال حج کی سعادت سے محروم رہ جائیں گے۔
سری لنکا کے ذرائع ابلاغ کی رپورٹ کے مطابق اس ملک کو شدید معاشی بحران کا سامنا ہے جس کے باعث وہاں کے مسلمان اس سال حج نہیں کرپائیں گے،اطلاعات کے مطابق سری لنکا کو آزادی کے بعد سے سب سے شدید معاشی بحران کا سامنا ہے جس کے باعث حکومتی منتظمین نے اعلان کیا ہے کہ رواں سال ملک کے مسلمان حج کی سعادت حاصل کرنے سے محروم رہیں گے۔

رپورٹ کے مطابق نیشنل حج کمیٹی نے ٹور آپریٹرز ایسوسی ایشن اور مسلم مذہبی اور ثقافتی امور کے محکمے سمیت کئی دیگر جماعتوں سے بات چیت کی جس کے بعد فیصلہ کیا گیا ہے کہ سری لنکا کے موجودہ معاشی حالات ٹھیک نہیں اس لیے کوئی بھی مسلمان حج نہیں کرسکے گا۔

حج ٹور آپریٹرز ایسوسی ایشن کے صدر سعید ایم رسمی نے اپنے بیان میں کہا کہ اس سال کے حج کو ترک کرنے کا فیصلہ مسلم کمیونٹی کے ارکان کی طرف سے ملک کی خاطر کیا گیا ہے تاکہ مشکل وقت میں یکجہتی کا مظاہرہ کیا جاسکے۔

انہوں نے کہا کہ ہمارے ملک کو اس وقت ڈالر کے سنگین بحران کا سامنا ہے جس پر قابو پانے کے لیے زیادہ سے زیادہ غیر ملکی کرنسی کی ضرورت ہے اور ہماری کوشش ہے مسلمان اس کٹھن وقت میں حکومت کا ساتھ دیں۔