سابق رکن کانگریس نے ٹرمپ اور ایران کے حوالے سے ان کے مؤقف پر سخت تنقید کی

سابق رکن کانگریس نے ٹرمپ اور ایران کے حوالے سے ان کے مؤقف پر سخت تنقید کی

امریکی ریاست جارجیا سے تعلق رکھنے والی سابق رکن کانگریس مارجوری ٹیلر گرین نے  صدر ڈونلڈ ٹرمپ کی خارجہ پالیسی خصوصاً ایران کے حوالے سے مؤقف پر سخت تنقید کی ہے اور کہا ہے کہ امریکی عوام ایران کے ساتھ جنگ نہیں چاہتے بلکہ وہ اپنی معاشی مشکلات کا حل چاہتے ہیں۔

انہوں نے سوشل میڈیا پلیٹ فارم ایکس پر اپنے بیان میں کہا کہ امریکی عوام جنگ کے بجائے ایسی زندگی چاہتے ہیں جس میں وہ اپنے اخراجات پورے کر سکیں اور مستقبل کے بارے میں پُرامید ہوں۔ ان کے بقول عوام نے مزید بیرونی جنگوں اور رجیم چینج کے خلاف ووٹ دیا تھا۔

گرین نے کہا کہ اگر واقعی امریکہ کو ترجیح دی جاتی تو امیر مالی معاونین اور مخصوص خارجہ ایجنڈوں کو ترجیح نہ دی جاتی۔ انہوں نے ٹرمپ کو مخاطب کرتے ہوئے کہا کہ اگر جیفری ایپسٹین کی فائلوں کو جعلی قرار نہ دیا جاتا اور تمام دستاویزات جاری کر دی جاتیں تو شاید عوام آپ کے پیغام پر زیادہ اعتماد کرتے۔

انہوں نے الزام عائد کیا کہ وائٹ ہاؤس اور ریپبلکن رہنما آئندہ وسط مدتی انتخابات اور اسٹیٹ آف دی یونین خطاب کے لیے اپنی حکمت عملی ترتیب دینے میں مصروف ہیں، جبکہ عام امریکی صحت بیمہ اور مہنگائی جیسے مسائل سے دوچار ہیں۔ ان کے مطابق ان کے سابق حلقہ انتخاب میں تقریباً پچہتر ہزار خاندانوں کی ہیلتھ انشورنس پریمیم دوگنی یا اس سے زیادہ ہو چکی ہے کیونکہ ٹیکس سبسڈیز ختم ہو گئی ہیں اور ریپبلکن قیادت صحت بیمہ کے نظام میں اصلاحات لانے میں ناکام رہی ہے۔

گرین نے کہا کہ ایک اور بیرونی جنگ، خصوصاً ایران کے ساتھ، صورتحال کو مزید خراب کرے گی اور اس سے عام امریکیوں کو کوئی فائدہ نہیں ہوگا۔ انہوں نے زور دیا کہ حکومت کو حقیقی نتائج دینا ہوں گے کیونکہ احترام حاصل کیا جاتا ہے، زبردستی نہیں لیا جاتا۔

مارجوری ٹیلر گرین 2020 میں ٹرمپ کی مضبوط حامی کے طور پر کانگریس میں داخل ہوئیں اور ایک وقت میں ایوان نمائندگان میں ان کی قریبی اتحادی سمجھی جاتی تھیں، تاہم بعد میں انہوں نے بعض پالیسی معاملات پر اختلاف کرتے ہوئے تنقیدی رویہ اختیار کیا۔

انہوں نے 5 جنوری 2026 کو جیفری ایپسٹین کیس کی فائلوں کی اشاعت کے مطالبے کے بعد اپنے عہدے سے استعفیٰ دیا تھا۔ ان کی درخواست پر ایوان نمائندگان نے ایک قانون کی منظوری دی جس کے تحت ایف بی آئی اور محکمہ انصاف کو ایپسٹین سے متعلق غیر خفیہ دستاویزات جاری کرنے کا پابند بنایا گیا۔ بعد ازاں سینیٹ نے بھی اس کی توثیق کی اور بالآخر صدر نے اس پر دستخط کر دیے۔

ان کے استعفے کے بعد ریاست جارجیا کے گورنر نے قانون کے مطابق خصوصی انتخاب کے انعقاد کا اعلان کیا تاکہ ان کی باقی مدت کے لیے نیا رکن منتخب کیا جا سکے۔