روس بھی ایران کے ساتھ مل کر افغانستان پاکستان تنازع میں ثالثی کے لیے تیار ہے: پاکستانی میڈیا

?️ 16 نومبر 2025

 روس بھی ایران کے ساتھ مل کر افغانستان پاکستان تنازع میں ثالثی کے لیے تیار ہے: پاکستانی میڈیا

پاکستانی ٹی وی چینل جیو نیوز نے رپورٹ دیا ہے کہ اسلامی جمہوریۂ ایران کے بعد اب روس نے بھی افغانستان اور پاکستان کے درمیان بڑھتی کشیدگی کم کرنے کے لیے ثالثی کی پیشکش کر دی ہے۔

جیو نیوز کے مطابق روسی وزارتِ خارجہ کی ترجمان نے کہا ہے کہ ماسکو کابل اور اسلام آباد کے درمیان حالیہ تناؤ پر گہری تشویش رکھتا ہے اور اسے خطے کے امن کے لیے سنگین خطرہ سمجھتا ہے۔ ترجمان کا کہنا تھا کہ روس دونوں ملکوں کے درمیان کشیدگی کم کرنے اور مذاکرات کی بحالی کے لیے ہر ممکن تعاون کرنے کو تیار ہے اور یقین رکھتا ہے کہ اس طرح کے اقدامات خطے میں دیرپا سلامتی کو مضبوط کریں گے۔

رپورٹ میں مزید کہا گیا کہ روس کی یہ آمادگی ایران کے مؤقف سے ہم آہنگ ہے، جو پہلے ہی پاکستان اور افغانستان کے درمیان اختلافات دور کرانے کے لیے پیش پیش ہے۔

گزشتہ ہفتے ایران کے وزیر خارجہ سید عباس عراقچی نے پاکستان اور افغانستان کے وزرائے خارجہ سے علیحدہ علیحدہ ٹیلی فون پر گفتگو کی تھی۔ انہوں نے دونوں پڑوسی ممالک کے درمیان بڑھتی ہوئی کشیدگی پر تشویش ظاہر کرتے ہوئے کہا تھا کہ تہران تنازع کے حل اور کشیدگی میں کمی لانے کے لیے ہر طرح کے تعاون کو تیار ہے۔

عراقچی نے ترکی اور قطر کے وزرائے خارجہ سے بھی رابطہ کیا جو اسلام آباد اور کابل کے درمیان تین مرحلوں پر مشتمل مذاکرات میں ثالثی کر چکے ہیںاور موجودہ صورتحال پر تفصیلی تبادلۂ خیال کیا۔

رپورٹ کے مطابق خطے کے یہ سفارتی اقدامات افغانستان اور پاکستان کے درمیان بڑھتے ہوئے تناؤ کو کم کرنے کے لیے ایک مشترکہ کوشش کی عکاسی کرتے ہیں۔