حنظلہ غزہ کے قریب، درجنوں اسرائیلی ڈرونز کی کشتی پر پرواز

حنظلہ غزہ کے قریب، درجنوں اسرائیلی ڈرونز کی کشتی پر پرواز

بحرِ روم میں سفر کرتے ہوئے فلسطین کے محصور علاقے غزہ کی طرف بڑھنے والی امدادی کشتی حنظلہ پر اسرائیلی نگرانی اور دباؤ میں اضافہ ہو گیا ہے۔ فرانسیسی رکن پارلیمنٹ گابرییل کاتالا، جو اس کشتی پر سوار ہیں، نے الجزیرہ کو بتایا کہ گزشتہ رات 30 اسرائیلی ڈرونز کشتی کے اوپر پرواز کرتے رہے، جو کشتی کے سفر کو روکنے یا اسے خوفزدہ کرنے کی کوشش سمجھی جا رہی ہے۔

گابرییل کاتالا نے کہا:ہماری دعا ہے کہ اسرائیلی فوج کی جانب سے کسی حملے کے بغیر ہم غزہ کے ساحل تک پہنچ جائیں۔ ہم دنیا بھر کی اقوام سے اپیل کرتے ہیں کہ غزہ میں جاری نسل کشی کے خلاف مظاہرے کریں۔

یورپی پارلیمنٹ کی رکن اما فورو نے بھی کہا کہ وہ غزہ کے ساحل کے قریب پہنچ چکے ہیں اور انہیں خدشہ ہے کہ اسرائیلی قابض افواج انہیں گرفتار کر سکتی ہیں۔ انہوں نے مزید کہا:تل ابیب فلسطینیوں کو بھوکا مارنے کو ایک جنگی ہتھیار کے طور پر استعمال کر رہا ہے۔

یہ کشتی جس کا نام معروف فلسطینی کارٹونسٹ ناجی العلی کے مزاحمتی کردار "حنظلہ” کے نام پر رکھا گیا ہے اطالوی بندرگاہ سیراکوز (سِسلی) سے روانہ ہوئی ہے۔ یہ مشن دراصل فریڈم فلوٹیلا (ناوگان آزادی) مہم کا حصہ ہے، جو غزہ کا محاصرہ توڑنے کے لیے سرگرم ہے۔

کشتی میں 15 افراد سوار ہیں، جن میں یورپ اور فرانس کے ارکانِ پارلیمان، ڈاکٹرز، صحافی اور انسانی حقوق کے کارکن شامل ہیں۔ کشتی میں کچھ انسانی امداد، ادویات اور فلسطینیوں کے لیے عالمی یکجہتی کے پیغامات بھی موجود ہیں۔

یہ کشتی ایک ایسے وقت میں غزہ کی طرف روانہ ہوئی ہے جب صرف دو ماہ قبل ایک اور امدادی کشتی "مادلین” کو اسرائیلی بحریہ نے روک لیا تھا۔ اب حنظلہ علامتی اور عملی طور پر ایک پیغام دے رہا ہے کہ:غزہ تنہا نہیں ہے۔