حماس اگلی جنگ کی تیاری کر رہا ہے: صہیونی اخبار

سچ خبریں: عبرانی اخبار "یدیعوت احرونوت” نے اپنی ایک رپورٹ میں تصدیق کی ہے کہ حماس اگلے military confrontation کے لیے اپنی تیاریاں تیز کرچکا ہے۔

اخبار کے نامہ نگار اوی یسخاروف کے مطابق، حماس ابتدا ہی سے کہہ رہا تھا کہ وہ غزہ کی انتظامی حکومت سے دستبردار ہوسکتا ہے، لیکن وہ اپنے ہتھیار کبھی نہیں ڈالے گا۔ رپورٹ میں بتایا گیا ہے کہ اگلے ہفتوں میں حماس ہزاروں نئے مجاہدین کو بھرتی کرے گا اور غزہ کے بہت سے شہری اس میں شامل ہونے کے خواہشمند ہیں۔

اس صیہونی اخبار نے غاصب اسرائیلی ریجیم کی کمزوری پر مایوسی کا اظہار کرتے ہوئے لکھا کہ ہمیں تسلیم کرنا پڑ رہا ہے کہ ہم 6 اکتوبر والی صورت حال میں واپس آچکے ہیں، یہ صورتحال اسرائیل کے داخلی معاملات میں بھی ہے اور غزہ کے تناظر میں بھی۔

رپورٹ میں مزید کہا گیا ہے کہ حماس نے غزہ پٹی پر دوبارہ مکمل کنٹرول حاصل کر لیا ہے اور صیہونی کابینہ کے اراکین کو اس بات کا اندازہ ہوچکا ہے کہ حماس پہلے سے کہیں زیادہ مضبوط ہوچکا ہے۔

یسخاروف نے زور دیا کہ ایک اور تشویش، جو پہلے سے کسی طور کم نہیں، مقبوضہ فلسطینی علاقوں میں اسرائیل کے داخلی انتشار کی ہے جو جنگ کے بعد سے اب تک کم نہیں ہوا بلکہ حالیہ دنوں میں اور بھی بڑھ گیا ہے۔

یدیعوت احرونوت نے ہی ایک اور مضمون میں یوسی یشوعہ کے قلم سے لکھا کہ جس نے حماس کے ساتھ معاہدے کی منصوبہ بندی کی تھی وہ اس کے نتائج سے حیران نہیں ہونا چاہیے۔ اس کی وجہ بہت سادہ ہے: تمام اسرائیلی قیدیوں کو واپس لانے کے لیے کوئی واضح وقت مقرر نہیں کیا گیا تھا۔ اتنا بڑا قانونی خلا سامنے ہوتے ہوئے آخر ایسا معاہدہ کیسے تحریر کیا گیا؟

اخبار نے نوٹ کیا کہ حماس اپنا کنٹرول مضبوط کر رہا ہے اور ان قبائلی اراکین کو ختم کر رہا ہے جنہوں نے اس کی مخالفت کی تھی یا اسرائیل کی مدد کی تھی۔ یہ واقعات تل ابیب کو اس پریشان کن صورت حال میں ڈال رہے ہیں کہ وہ ان قبائل کی حفاظت کیسے کرے۔

مضمون نگار کا مزید کہنا تھا کہ حماس وقت ضائع نہیں کر رہا، بلکہ وہ موجودہ جنگ بندی کا فائدہ اٹھاتے ہوئے اپنی فوجی و شہری ڈھانچے کو دوبارہ منظم کر رہا ہے۔ تنظیم نے اسرائیلی فوج کے انخلا کے بعد خالی ہونے والے علاقوں پر کنٹرول کے لیے اپنے ہزاروں سیکورٹی اہلکاروں کو تعینات کرنے کا حکم جاری کیا ہے، جبکہ نئے گورنرز بھی مقرر کیے جاچکے ہیں۔