جولانی کا ماسکو کا پہلا دورہ، روسی اڈوں اور بشار الاسد کی حوالگی پر ممکنہ مذاکرات

جولانی کا ماسکو کا پہلا دورہ، روسی اڈوں اور بشار الاسد کی حوالگی پر ممکنہ مذاکرات

 شام کی عبوری حکومت کے سربراہ احمد الشرع المعروف ابو محمد الجولانی بدھ روس کے دارالحکومت ماسکو کے دورے پر روانہ ہو رہے ہیں، جہاں ان کی ملاقات روسی صدر ولادیمیر پوٹن سے متوقع ہے۔ باخبر ذرائع کے مطابق، اس ملاقات کا محور روسی فوجی اڈوں کی موجودگی اور بشار الاسد کی حوالگی کا مطالبہ ہو سکتا ہے۔

عربی روزنامہ العربی الجدید کے مطابق، یہ جولانی کا روس کا پہلا دورہ ہے جب سے گزشتہ سال دسمبر میں بشار الاسد کی حکومت کا خاتمہ ہوا۔ اس دورے کا مقصد دونوں ممالک کے درمیان سیاسی و اقتصادی تعلقات کو از سرِ نو منظم کرنا اور نئے شراکتی فریم ورک پر بات چیت کرنا بتایا جا رہا ہے۔

شامی صدارتی دفتر کے ایک ترجمان کے مطابق، جولانی اپنے روسی ہم منصب کے ساتھ علاقائی و بین الاقوامی امور، دوطرفہ تعاون اور مشترکہ مفادات کے تحفظ پر تبادلۂ خیال کریں گے۔

رپورٹ میں کہا گیا ہے کہ جولانی، طرطوس میں روسی بحری اڈے اور حمیمیم کے فضائی اڈے کی آئندہ موجودگی سے متعلق بھی گفتگو کریں گے۔ ایک حکومتی ذریعے نے تصدیق کی ہے کہ جولانی کے ہمراہ وزیرِ خارجہ اسعد الشیبانی، وزیرِ دفاع مرہف ابوقصرہ اور دیگر اعلیٰ فوجی و اقتصادی حکام بھی ہوں گے۔

اطلاعات کے مطابق، جولانی اپنے نئے فوجی ڈھانچے کی تنظیمِ نو اور روسی سرمایہ کاری و فوجی تعاون کے معاملات پر بھی بات چیت کریں گے۔

چند روز قبل روسی وزیر خارجہ سرگئی لاوروف نے کہا تھا کہ شام کی نئی حکومت روسی اڈوں کی موجودگی کو برقرار رکھنے میں گہری دلچسپی رکھتی ہے۔

سیاسی ماہرین کے مطابق، جولانی کا یہ دورہ ایک حساس سیاسی مرحلے میں ہو رہا ہے، جب نئی شامی قیادت خطے میں اپنی خارجہ پالیسی کے توازن کو ازسرنو ترتیب دینے اور روس کے ساتھ شراکت کو مستحکم کرنے کی کوشش کر رہی ہے۔

ماہرین کا کہنا ہے کہ یہ دورہ دمشق کی جانب سے ماسکو کو یقین دہانی کا پیغام بھی ہے کہ شام میں روس کے اسٹریٹجک مفادات، خصوصاً طرطوس اور حمیمیم کے اڈوں کی سلامتی برقرار رہے گی۔ یہ پیش رفت اس وقت ہو رہی ہے جب مشرقِ وسطیٰ کے حالات تیزی سے بدل رہے ہیں اور طاقت کا توازن نئے خطوط پر استوار ہو رہا ہے۔