ایٹالوی وزیر اعظم اور دو وزیروں کے خلاف غزہ عالمی عدالت میں مقدمہ دائر،غزہ نسل کشی کا الزام 

ایٹالوی وزیر اعظم اور دو وزیروں کے خلاف غزہ عالمی عدالت میں مقدمہ دائر،غزہ نسل کشی کا الزام

 اٹلی کی وزیراعظم جورجیا میلونی نے انکشاف کیا ہے کہ انہیں اور ان کی کابینہ کے دو وزراء کو غزہ میں اسرائیلی نسل کشی میں شریک ہونے کے الزام میں عالمی فوجداری عدالت میں پیش کیا گیا ہے۔

ایٹالوی خبررساں ادارے آنسا کے مطابق، میلونی نے منگل کی شب ایک انٹرویو میں کہا کہ مجھے، وزیر خارجہ آنتونیو تاجانی، وزیر دفاع گویڈو کروستو اور فوجی کمپنی لئوناردو کے سربراہ روبرتو چنولانی کو نسل کشی میں شراکت کے الزام میں ہیگ کی عالمی عدالت میں پیش کیا گیا ہے۔

انہوں نے اٹلی کے سرکاری ٹی وی Rai1 سے گفتگو کرتے ہوئے کہا کہ میرا خیال نہیں کہ دنیا یا تاریخ میں کبھی ایسا مقدمہ چلا ہو جس میں کسی منتخب حکومت پر ایسے سنگین الزامات عائد کیے گئے ہوں۔

میلونی نے فلسطینیوں کے حق میں ہونے والے مظاہروں کا ذکر کرتے ہوئے کہا کہ جو لوگ فلسطین سے ہمدردی کے لیے سڑکوں پر نکلے ہیں، وہ “ایجنٹ” نہیں بلکہ “جذباتی اور انسان دوست افراد ہیں، اور انہوں نے ان کے لیے احترام کا اظہار کیا۔

قابل ذکر ہے کہ بین الاقوامی فوجداری عدالت (ICC) نے یکم دسمبر 2024 کو اسرائیلی وزیراعظم بنیامین نتن یاہو اور سابق وزیر جنگ یوآو گالانت کے خلاف جنگی جرائم، انسانیت کے خلاف جرائم اور غزہ کے عوام کو بھوک سے مارنے کے الزامات میں گرفتاری کے وارنٹ جاری کیے تھے۔

اس سے قبل جنوبی افریقہ نے دسمبر 2023 میں بین الاقوامی عدالتِ انصاف (ICJ) میں اسرائیل کے خلاف نسل کشی کے مقدمے کا آغاز کیا تھا، جس میں الزام لگایا گیا تھا کہ اسرائیل نے غزہ میں فلسطینی عوام کے خلاف نسل کشی کے کنونشن کی کھلی خلاف ورزی کی ہے۔

یہ مقدمہ اب عالمی سطح پر وسعت اختیار کر چکا ہے، اور کئی ممالک  جن میں نکاراگوا، کیوبا، آئرلینڈ، کولمبیا، لیبیا، میکسیکو، فلسطین، اسپین، بیلیز اور ترکیہ شامل ہیں  اس قانونی شکایت میں جنوبی افریقہ کے ساتھ شامل ہو چکے ہیں۔