ایران اور امریکہ کے درمیان جاری مذاکرات مثبت نتیجے پر پہنچیں گے :اقوام متحدہ 

 ایران اور امریکہ کے درمیان جاری مذاکرات مثبت نتیجے پر پہنچیں گے :اقوام متحدہ

 اقوامِ متحدہ کے ترجمان اسٹیفن دوجارک نے امید ظاہر کی ہے کہ ایران اور امریکہ کے درمیان جاری مذاکرات کسی مثبت نتیجے پر پہنچیں گے اور خطے میں کشیدگی کم کرنے میں مددگار ثابت ہوں گے۔

میڈیا سے گفتگو کرتے ہوئے انہوں نے کہا کہ اس وقت سفارتی سرگرمیاں تیز ہو چکی ہیں اور مختلف مقامات پر اہم ملاقاتیں جاری ہیں۔ ان کا کہنا تھا کہ اقوامِ متحدہ کی توجہ خطے میں تناؤ کم کرنے پر مرکوز ہے اور توقع ہے کہ واشنگٹن اور تہران کے درمیان بات چیت اسی سمت میں پیش رفت کرے گی۔

یہ بیان اسرائیلی وزیرِاعظم بنیامین نیتن یاہو کے دورۂ واشنگٹن سے قبل سامنے آیا ہے، جہاں وہ امریکی صدر ڈونلڈ ٹرمپ سے ملاقات کریں گے۔ وائٹ ہاؤس کی جانب سے بھی دونوں رہنماؤں کی ملاقات کی تصدیق کی گئی ہے۔

امریکی صدر نے ایک انٹرویو میں کہا کہ انہیں نہیں لگتا کہ نیتن یاہو ایران-امریکہ مذاکرات سے پریشان ہیں، بلکہ وہ ایک اچھے معاہدے کے خواہاں ہیں۔

ایران اور امریکہ کے درمیان جوہری مذاکرات کا نیا دور 6 فروری 2026 کو عمان کے دارالحکومت مسقط میں عمانی وزیر خارجہ بدر البوسعیدی کی ثالثی میں منعقد ہوا۔ اس دور میں دونوں ممالک نے اپنے مؤقف اور تجاویز ایک دوسرے تک پہنچائیں۔ فریقین نے مذاکرات کو مثبت قرار دیتے ہوئے آئندہ بھی بات چیت جاری رکھنے پر آمادگی ظاہر کی ہے۔