ایران اسرائیل کو خطے میں تسلط سے روک رہا ہے: انصار اللہ

سچ خبریں: انصاراللہ کے رہنما سید عبدالملک الحوثی نے ماہ رمضان کے آغاز پر امت اسلام کو درپیش چیلنجز پر تفصیلی گفتگو کی ہے۔ ان کا کہنا تھا کہ آج تمام عرب اور اسلامی ممالک شدید مسائل کا شکار ہیں جو کہ انتہائی افسوسناک صورتحال ہے۔

انہوں نے امت اسلام کی موجودہ صورتحال کو تبدیل کرنے پر زور دیتے ہوئے کہا کہ اللہ تعالیٰ نے امت کو جو صلاحیتیں عطا کی ہیں، ان کے ذریعے حالات کو بہتر بنایا جا سکتا ہے۔ الحوثی نے واضح کیا کہ امت کی ذمہ داریوں میں کوتاہی کی بنیادی وجہ تقویٰ کا فقدان ہے۔

انصاراللہ کے رہنما نے تنقید کرتے ہوئے کہا کہ بعض حکومتوں نے جہاد فی سبیل اللہ جیسی اہم ذمہ داریوں کو اپنی ترجیحات کی فہرست سے خارج کر دیا ہے۔ انہوں نے مزید کہا کہ کچھ نظام جہاد اور امر بالمعروف و نہی عن المنکر جیسے امور پر بات کرنے کو بھی دشمنی تصور کرتے ہیں۔

امت اسلام پر دشمنان کے حملوں کا ذکر کرتے ہوئے سید عبدالملک الحوثی نے کہا کہ دشمن سافٹ وار (نرم جنگ) کے ذریعے امت کو اللہ کی ہدایت اور دین سے دور کرنے میں مصروف ہیں، تاکہ کوئی چیز انہیں گمراہی سے بچانے والی نہ رہے۔

الحوثی نے خبردار کیا کہ آج امت اسلام کو یہودیوں، صہیونیوں اور ان کے امریکی، اسرائیلی اور برطانوی اتحادیوں کی شکل میں انتہائی کینہ پرور دشمنوں کا سامنا ہے۔ انہوں کہا کہ اسرائیلی رژیم فلسطین، لبنان اور شام میں مسلسل مظالم کا ارتکاب کر رہی ہے۔

ان کا کہنا تھا کہ یہ جرائم دشمنان کا غلبہ اور جبر مسلط کرنے کی کوشش کا حصہ ہیں، اور اس کے سامنے سر تسلیم خم کرنا انتہائی خطرناک ہے۔ انصاراللہ کے رہنما نے غزہ کے عوام پر ظالمانہ محاصرے کے اثرات پر بھی روشنی ڈالی۔

سید عبدالملک الحوثی نے علاقے میں اسرائیلی عزائم کا ذکر کرتے ہوئے کہا کہ صہیونی ریجیم امریکہ کے تعاون سے پورے خطے پر تسلط چاہتا ہے، اسی لیے ان کی توجہ جمہوری اسلامی ایران پر ہے جسے وہ اپنی راہ میں پہلی رکاوٹ سمجھتے ہیں۔ انہوں نے ایران کے موقف کو بھرپور اور مستحکم قرار دیتے ہوئے حالیہ عظیم عوامی ریلی کو تاریخی اہمیت کا حامل قرار دیا۔

اپنے خطاب میں الحوثی نے مجرمانہ ایپسٹین کیس کا بھی ذکر کیا اور صیہونیت کو اس کے پیچھے قرار دیا۔ ان کا کہنا تھا کہ سامنے آنے والی دستاویزات سے ثابت ہوتا ہے کہ بچوں اور نوجوانوں کے ساتھ انتہائی ہولناک جرائم کا ارتکاب کیا گیا۔ الحوثی نے اس کیس کو دشمنان کی فساد پھیلانے کی کوششوں کی دلیل قرار دیا۔