ایرانی حملے میں امریکہ کو 111 ملین ڈالر کا نقصان؛ واشنگٹن نے سبق مل گیا

ایرانی حملے میں امریکہ کو 111 ملین ڈالر کا نقصان؛ واشنگٹن نے سبق مل گیا

امریکی جریدے نیوزویک کے مطابق، ایران کی جانب سے قطر میں واقع امریکی ہوائی اڈے العدید پر جوابی میزائل حملہ واشنگٹن کے لیے محض ایک دفاعی چیلنج نہیں تھا، بلکہ یہ ایک عملی سبق بھی تھا جس نے امریکہ کو چین اور شمالی کوریا جیسے ممکنہ دشمنوں کے خلاف اپنی دفاعی تیاری بہتر بنانے کا موقع فراہم کیا۔

اس حملے میں ایران نے جون کے مہینے میں امریکہ کی جانب سے فردو نیوکلیئر سائٹ پر بمباری کے ردعمل میں 14 بیلسٹک میزائل داغے۔ امریکی فوج نے اس حملے کو روکنے کے لیے پیٹریاٹ میزائل سسٹمز سے تقریباً 30 دفاعی میزائل فائر کیے، جن کی مجموعی لاگت 111 ملین ڈالر بتائی گئی ہے۔ یہ امریکہ کی فوجی تاریخ میں پیٹریاٹ سسٹم کی سب سے بڑی مداخلت تصور کی جا رہی ہے۔

نیوزویک کے مطابق، اس واقعے نے امریکی دفاعی نظام خصوصاً پیٹریاٹ یونٹس کو ایک حقیقی جنگی صورت حال میں آزمانے کا نادر موقع دیا۔ اس وقت امریکہ اپنے دفاعی نظام کو بحرالکاہل، اسرائیل، گوام اور جنوبی کوریا جیسے علاقوں میں پھیلانے کی کوشش کر رہا ہے تاکہ ایران، حوثی مزاحمت اور دیگر ممکنہ خطرات سے نمٹا جا سکے۔

ماہرین کا کہنا ہے کہ یہ حملہ امریکی دفاعی نظام کی کارکردگی کے لیے ایک اہم تجربہ تھا اور اب واشنگٹن اپنے ذخائر میں موجود میزائلوں کی دوبارہ فراہمی اور جدیدیت کی جانب تیزی سے بڑھ رہا ہے۔

نیوزویک کے مطابق، اس حملے کے بعد امریکی افواج کو نہ صرف مشرق وسطیٰ بلکہ ایشیائی خطے میں بھی اپنی تیاری بڑھانے کی ضرورت محسوس ہوئی ہے، خاص طور پر چین کے تائیوان پر ممکنہ حملے اور شمالی کوریا کے میزائل پروگرام کے تناظر میں۔