انڈونیشیا یوکرین جنگ کے خاتمے کے لیے کوشاں

?️ 28 جون 2022

سچ خبریں:انڈونیشیا کے صدر جلد ہی روس اور یوکرین کا دورہ کریں گے جس کا مقصد یوکرین میں جنگ کے خاتمے اور متحارب فریقوں کے درمیان امن قائم کرنے کی کوشش کرنا ہے۔
انڈونیشیا کی سرکاری خبر رساں ایجنسی انٹارا کی رپورٹ کے مطابق انڈونیشیا کے وزیر خارجہ رینٹو مارسودی نے کہا کہ اس ملک کے صدر جوکو ویدودو اور جی 20 کے سربراہ جون کے آخر میں روس اور یوکرین کا دورہ کرنے والے ہیں، واضح رہے کہ وہ اس وقت G7 سربراہی اجلاس میں شرکت کے لیے جرمنی میں ہیں اور سربراہی اجلاس میں شرکت کے بعد جرمنی سے یوکرین اور روس کے لیے روانہ ہوں گے۔

خبروں کی بنیاد پر جنگ کے آغاز کے بعد ویدوڈو دونوں ممالک کا سفر کرنے والے پہلے ایشیائی رہنما ہوں گے،یاد رہے کہ انڈونیشیا جس کی آبادی 270 ملین سے زیادہ ہے، دنیا کا چوتھا سب سے زیادہ آبادی والا ملک ہے جہاں یوکرائن کی جنگ کے آغاز کے بعد سے خوراک کی درآمد کا سلسلہ منقطع ہے۔

انڈونیشیا کے صدر کا منصوبہ ہے کہ وہ روس اور یوکرین کے اعلیٰ حکام کے ساتھ یوکرین جنگ کے معاشی اور انسانی نتائج اور خوراک کے بحران پر بات چیت کریں گے،انڈونیشیا کے صدر یوکرین کے صدر ولادیمیر زیلنسکی اور روسی صدر ولادیمیر پیوٹن سے الگ الگ ملاقات کریں گے۔