انصاراللّٰہ کا سلامتی کونسل کی پابندیوں کے فیصلے پر سخت ردعمل،جواب ضرور دیا جائے گا

?️ 15 نومبر 2025

انصاراللّٰہ کا سلامتی کونسل کی پابندیوں کے فیصلے پر سخت ردعمل،جواب ضرور دیا جائے گا

اقوامِ متحدہ کی سلامتی کونسل کی جانب سے یمن پر عائد پابندیوں میں ایک سال کی توسیع کے فیصلے کے بعد، انصاراللّٰہ کے سیاسی دفتر کے رکن محمد الفرح نے اس اقدام کو شدید تنقید کا نشانہ بناتے ہوئے اسے کھلی دوہری پالیسی قرار دیا ہے۔

المیادین کے مطابق، الفرح نے کہا کہ سلامتی کونسل برسوں سے غزہ میں اسرائیلی مظالم پر خاموش رہی ہے، اور اب دوبارہ مغربی مفادات کے لیے ایک آلہ کار کے طور پر استعمال ہو رہی ہے۔

انہوں نے خبردار کیا کہ صنعا ہر اس ملک یا فریق کا متقابل جواب دے گا جو یمن کی خودمختاری، سلامتی یا مفادات کو نقصان پہنچانے کی کوشش کرے گا۔ انصاراللّٰہ کے مطابق، یمنی عوام کے حقوق، دین اور قومی وقار کے دفاع پر کوئی سمجھوتہ نہیں ہوگا۔

الفرح نے یہ بھی کہا کہ روس اور چین نے جب اس قرارداد کے حق میں ووٹ نہیں دیا، تو یہ ان کی “اخلاقی بیداری” کا ثبوت ہے۔ تاہم ان کے مطابق، توقع تھی کہ یہ دونوں ممالک فیصلے کو مکمل طور پر روک دیتے۔

انہوں نے امریکہ اور بعض مغربی ممالک پر الزام لگایا کہ وہ بلا شرط اسرائیل کی حمایت کر رہے ہیں اور یمن پر پابندیوں کا مقصد “صہیونی ایجنڈے کی خدمت” اور غزہ کی حمایت کرنے پر یمنی عوام کو سزا دینا ہے۔

جمعہ کو منظور کی گئی قرارداد کے مطابق:یمن سے متعلق مالی پابندیاں اور سفری پابندیاں 14 نومبر 2026 تک جاری رہیں گی۔یمن پر پابندیوں کی نگرانی کرنے والے گروپ آف ایکسپرٹس کی مدت 15 دسمبر 2026 تک بڑھا دی گئی ہے۔

قرارداد میں یمن کی سرحدوں اور بحری راستوں میں ہونے والے حملوں کی بھی مذمت کی گئی ہے اور انہیں فوری طور پر روکنے کا مطالبہ کیا گیا ہے۔انصاراللّٰہ کا کہنا ہے کہ یمن پر کسی بھی دباؤ کا جواب مناسب اور مؤثر انداز میں دیا جائے گا۔