امریکی ہسپتالوں میں کورونا کا شکار بچوں کی تعداد کا ریکارڈ قائم

?️ 9 جنوری 2022

سچ خبریں:یو ایس سینٹرز فار ڈیزیز کنٹرول اینڈ پریوینشن کا کہنا ہے کہ ریاستہائے متحدہ میں ہسپتالوں میں آنے والے کورونا کا شکار بچوں کی تعداد میں نمایاں اضافہ ہوا ہے۔
کانگریس نیوز ویب سائٹ کی رپورٹ کے مطابق یو ایس سینٹرز فار ڈیزیز کنٹرول اینڈ پریوینشن کی ڈائریکٹر ریچل ویلنسکی کا کہنا ہے کہ کورونا وائرس سے متاثرہ بچوں کی تعداد ایک نئے ریکارڈ تک پہنچ گئی ہے جنہیں امریکی اسپتالوں میں داخل کیا گیا ہے نیز طلباء اور اساتذہ کی اسکولوں میں حاضری سے متعلق صحت اور قرنطینہ کے نئے رہنما اصولوں کی ضرورت ہے۔

انہوں نے متنبہ کیا کہ امریکی ہسپتالوں میں کورونا کا شکار ے بچوں کی تعداد اس وبائی مرض کے شروع ہونے کے بعد سے اپنی بلند ترین سطح پر پہنچ گئی ہے اگرچہ یہ تعداد اب بھی ہسپتال میں داخل بالغوں کی تعداد سے بہت کم ہے،واضح رہے کہ کورونا وائرس کا شکار اسپتال میں داخل بچوں کی اکثریت 4 سال سے کم عمر کے بچوں کی ہے۔

سرکاری اعداد و شمار کے مطابق، یکم جنوری تک چار سال سے کم عمر کے ہر 100000 امریکی بچوں میں سے 4.3 کورونا وائرس کی وجہ سے ہسپتالوں میں داخل ہوئے جبکہ 12 سے 17 سال کی عمر کے 50 فیصد سے بھی کم امریکی بچوں کو ابھی تک مکمل طور پر ویکسین لگائی گئی ہے اور 5 سے 11 سال کی عمر کے 16 فیصد بچوں کو مکمل ویکسین لگائی گئی ہے۔