امریکی عوام نے نیتن یاہو کو سب سے زیادہ ناپسندیدہ غیر ملکی سیاستدان قرار دیا

امریکی عوام نے نیتن یاہو کو سب سے زیادہ ناپسندیدہ غیر ملکی سیاستدان قرار دیا

امریکا میں کیے گئے تازہ ترین گالوپ سروے کے مطابق صہیونی وزیراعظم بنیامین نیتن یاہو کو امریکی عوام نے سب سے زیادہ ناپسندیدہ غیر ملکی سیاستدان قرار دیا ہے۔

تفصیلات کے مطابق جولائی 2025 میں منعقدہ اس سروے میں نیتن یاہو کو 52 فیصد منفی اور صرف 29 فیصد مثبت رائے ملی، جو کسی بھی غیر ملکی رہنما کے لیے سب سے کم مقبولیت ہے۔

اسی سروے میں یوکرین کے صدر ولودیمیر زلنسکی 52 فیصد مثبت اور 34 فیصد منفی رائے کے ساتھ امریکا کے عوام میں سب سے مقبول غیر ملکی سیاستدان قرار پائے۔ جبکہ اندرون ملک سیاستدانوں میں ورمونٹ کے سینیٹر برنی سینڈرز 49 فیصد مثبت رائے کے ساتھ سب سے پسندیدہ امریکی رہنما کے طور پر سامنے آئے۔

امریکی نیوز ویب سائٹ TNR کے مطابق یہ نتائج عوامی رائے میں نمایاں تبدیلی کی عکاسی کرتے ہیں اور ظاہر کرتے ہیں کہ جنگِ یوکرین اور مشرق وسطیٰ کا بحران امریکی عوام کے رویوں پر براہِ راست اثر ڈال رہا ہے۔

اس سے قبل امریکی جریدہ فارین پالیسی نے ایک تجزیے میں لکھا تھا کہ اسرائیل کی مقبولیت امریکا میں اپنی تاریخ کی نچلی ترین سطح پر پہنچ گئی ہے۔ تجزیے کے مطابق غزہ میں بھوک اور قحط کے مناظر نے اسرائیلی پالیسیوں کے خلاف شدید عالمی ردعمل پیدا کیا ہے۔

رپورٹ کے مطابق نیتن یاہو جاری جنگ کے ذریعے نہ صرف فلسطینی ریاست کے قیام کی ہر کوشش کو ناکام بنانا چاہتے ہیں بلکہ غزہ پر دوبارہ مکمل کنٹرول حاصل کرنے اور اسرائیلی سرحدوں کو وسعت دینے کی پالیسی پر عمل پیرا ہیں۔

مزید برآں، صہیونی فوج کی جانب سے اسپتالوں، تعلیمی اداروں اور سرکاری عمارتوں کی تباہی کے ساتھ ساتھ اقوام متحدہ کے امدادی کاموں کو بھی شدید نقصان پہنچایا گیا ہے۔

ذرائع کے مطابق امریکی عوام کی اسرائیل کے لیے حمایت اب تک کی کم ترین سطح پر پہنچ چکی ہے جبکہ فلسطین کے لیے ہمدردی میں نمایاں اضافہ ہوا ہے۔ گالوپ کے پچھلے سروے میں بھی یہ واضح کیا گیا تھا کہ صرف 32 فیصد امریکی شہری اسرائیل کے غزہ میں اقدامات کی حمایت کرتے ہیں۔یہ رجحان خاص طور پر نوجوانوں اور ڈیموکریٹ ووٹرز میں زیادہ نمایاں ہے، جو اسرائیلی پالیسیوں سے بڑھتی ہوئی ناراضی کو ظاہر کرتا ہے۔