امریکی ایوان کے اسپیکر ٹرمپ کو امن کا اگلا نوبل انعام دینے کی کوشش کر رہے ہیں

اگرچہ امریکی صدر ڈونلڈ ٹرمپ اس سال نوبیل امن انعام حاصل کرنے میں ناکام رہے، لیکن ایوانِ نمائندگان کے ریپبلکن اسپیکر مائیک جانسن نے اعلان کیا ہے کہ وہ عالمی رہنماؤں کی حمایت حاصل کر کے اگلے سال کا نوبیل امن انعام ٹرمپ کو دلانے کی مہم شروع کر رہے ہیں۔

امریکی میڈیا کے مطابق، جانسن نے منگل کے روز مقامی وقت کے مطابق کہا کہ وہ اسرائیلی پارلیمان (کنست) کے اسپیکر کے ساتھ مل کر ایک بین الاقوامی مہم شروع کر رہے ہیں، جس کا مقصد عالمی سطح پر ٹرمپ کی نامزدگی کے لیے حمایت حاصل کرنا ہے۔

انہوں نے ایک پریس کانفرنس میں کہا صدر ٹرمپ کی قیادت میں ہم نے نہ صرف امریکہ بلکہ پوری آزاد دنیا کے لیے ایک نئے سنہرے دور کا آغاز دیکھا ہے۔ ان سے زیادہ کوئی بھی شخص اس اعزاز کا مستحق نہیں۔

جانسن اور دیگر ریپبلکن رہنما ٹرمپ کے اسرائیل اور حماس کے درمیان جنگ بندی کے معاہدے میں مبینہ ثالثی کے کردار کو ان کے حق میں ایک بڑی کامیابی قرار دے رہے ہیں۔

گزشتہ ہفتے جب نوبیل انعام کا اعلان ہونے والا تھا، ٹرمپ کے حامیوں نے بارہا ان کے لیے امن انعام دینے کا مطالبہ کیا تھا۔ تاہم، نوبیل کمیٹی نے آخرکار وینیزویلا کی اپوزیشن رہنما ماریا کورینا ماچادو کو 2025 کا امن انعام دینے کا اعلان کیا۔