امریکہ کی جانب سے سعودی عرب کو ایف-۳۵ لڑاکا طیارے فروخت کرنے پر صہیونی حکومت کو تشویش

?️ 16 نومبر 2025

امریکہ کی جانب سے سعودی عرب کو ایف-۳۵ لڑاکا طیارے فروخت کرنے پر صہیونی حکومت کو تشویش

امریکہ کی جانب سے سعودی عرب کو ایف-۳۵ لڑاکا طیارے فروخت کرنے کے امکان نے اسرائیلی قیادت میں تشویش پیدا کر دی ہے۔ اسرائیلی حکام کا کہنا ہے کہ اس سے خطے میں اسرائیل کی فضائی برتری متاثر ہو سکتی ہے، تاہم بعض حلقے اس شرط کے ساتھ اس پر اتفاق کر سکتے ہیں کہ سعودی عرب اور اسرائیل کے درمیان مکمل تعلقات معمول پر آئیں۔

اسرائیلی میڈیا کے مطابق، سابق وزیر برائے اسٹریٹجک امور ران ڈریمر نے امریکہ میں اعلیٰ حکام سے ملاقات میں واضح کیا کہ اسرائیل اس معاہدے کے حق میں نہیں، جب تک سعودی عرب کے ساتھ تعلقات معمول پر نہ آئیں۔ اسرائیلی فوج نے بھی خدشہ ظاہر کیا ہے کہ ایف-۳۵ طیارے سعودی عرب کے پاس آنے سے اسرائیل کی فضائی کارروائی کی آزادی محدود ہو سکتی ہے اور خطے میں توازن متاثر ہو سکتا ہے۔

اس دوران، بعض اعلیٰ اسرائیلی حکام نے موقف اختیار کیا کہ اگر سعودی عرب کے ساتھ تعلقات معمول پر آئیں اور یہ طیارے علاقائی تعاون کے تحت فروخت ہوں تو اسرائیل اسے قبول کر سکتا ہے، جیسا کہ پہلے متحدہ عرب امارات کے ساتھ ہوا۔

امریکہ اور سعودی عرب کے درمیان ایف-۳۵ کی فروخت، سیکیورٹی تعاون اور اسرائیل کے ساتھ تعلقات کے معمول پر آنے کے معاملات پر مباحثہ متوقع ہے۔ توقع ہے کہ ولیعہد محمد بن سلمان اگلے منگل کو واشنگٹن میں صدر ڈونالڈ ٹرمپ سے ملاقات کریں گے، جہاں ان امور پر غور کیا جائے گا۔