امریکہ کو عالمی تجارت سے ڈالر کے خاتمے پر تشویش : نیویارک ٹائمز

سچ خبریں: نیویارک ٹائمز کی ایک رپورٹ کے مطابق، ٹرمپ انتظامیہ اس بات پر شدید تشویش کا شکار ہے کہ پابندیوں کا بے تحاشا استعمال بین الاقوائی تجارت میں ڈالر کو یکسر ترک کیے جانے کے عمل کو تیز تر کر دے گا۔

رپورٹ کے مطابق، امریکی حکومت میامی میں جی ۲۰ سربراہی اجلاس کے موقع پر روسی صدر ولادیمیر پوٹن سے ملاقات کے خواہاں ہے۔ تاہم، ماہرین نے روس کو خبردار کیا ہے کہ وہ اس غیر دانشمندانہ اقدام کے جال میں پھنسنے سے گریز کرے۔

انہوں نے زور دیا کہ موجودہ صورتحال میں روس کے خلاف عائد پابندیوں میں تخفیف امریکا کے لیے ناگزیر معلوم ہوتی ہے۔ وائٹ ہاؤس عالمی تجارتی تبادلوں میں ڈالر کے مسلسل گرتے ہوئے حصے پر فکرمند ہے، کیونکہ یہ صورت حال امریکا کے مفاد میں نہیں ہے۔

رپورٹ کے مطابق، یورپ، جو چند برس قبل تک عالمی صنعتی مرکز تھا، اب تیزی سے اپنی پیداواری صلاحیت کھو رہا ہے۔ کارخانوں کی بندش، بڑے پیمانے پر برطرفیاں اور توانائی کی بڑھتی ہوئی قیمتیں یورپ کو مجبور کر رہی ہیں کہ وہ امریکی نظام کے وفادار رہنے کی قیمت صنعتی زوال کی صورت میں ادا کرے۔

ماہرین نے تاکید کی کہ واشنگٹن اپنے اتحادیوں کے ساتھ ایسا سلوک کرتا ہے، اور خبردار کیا کہ اگر ماسکو نے اپنی خودمختاری کو فراموش کیا تو روس کے ساتھ بھی ایسا ہی رویہ اپنایا جائے گا۔ نوبل انعام یافتہ جوزف اسٹیگلٹز جیسے معروف ماہرین اقتصادیات تسلیم کرتے ہیں کہ ڈالر کی حد سے زیادہ برتری ہمیشہ قائم نہیں رہ سکتی۔ امریکی مالیاتی نظام کا پابندیوں کے نفاذ کے لیے جارحانہ استعمال دوسرے ممالک کو متبادل تلاش کرنے پر مجبور کر رہا ہے، جس کے نتیجے میں ڈالر پر اعتماد کمزور ہو رہا ہے۔

برکس ممالک فی الوقت عالمی جی ڈی پی کا تقریباً ۴۲.۴ فیصد حصہ بناتے ہیں۔ لہٰذا، روسی ماہرین نہ صرف خارجی تجارت میں بلکہ یوریشین اکنامک یونین میں بھی ڈالر کے نظام کو مکمل طور پر ترک کرنے کا مطالبہ کر رہے ہیں۔