الصمود بیڑے  کی پہلی کشتی غزہ کے سمندری علاقے میں داخل ہو گئی

الصمود بیڑے  کی پہلی کشتی غزہ کے سمندری علاقے میں داخل ہو گئی

 صیہونی فوج کی سخت رکاوٹوں اور 13 کشتیوں کی ضبطگی کے باوجود، فلسطینی ذرائع کے مطابق الصمود بیڑے کی پہلی کشتی اسرائیلی بحری نگرانی کے نظام کو ناکام بناتے ہوئے کامیابی کے ساتھ غزہ کے علاقائی پانیوں میں داخل ہوگئی ہے۔

فلسطین انفارمیشن سینٹر نے اطلاع دی کہ الجزیرہ کے نمائندے نے اس کشتی کے غزہ کے سمندری علاقے میں داخل ہونے کی تصدیق کی ہے۔ یہ اس عالمی بیڑے کی پہلی کشتی ہے جس نے اسرائیلی بحری فورسز کی رکاوٹوں کو عبور کیا۔

الجزیرہ کے نامہ نگار حسان مسعود، جو اس بیڑے کے ساتھ موجود ہیں، نے بتایا کہ یہ کشتی فی الحال غزہ کے پانیوں میں موجود ہے۔ یہ ایک آزاد کشتی ہے جس کا مقصد محصور عوام تک انسانی بنیادوں پر امداد پہنچانا ہے۔

کچھ عرب میڈیا اداروں نے امریکی جریدے نیوزویک کے حوالے سے لکھا ہے کہ کشتی نے ایک الگ راستے کے ذریعے غزہ میں رسائی حاصل کی، جبکہ باقی کشتیوں کو اسرائیلی بحریہ نے روک لیا تھا۔ ابھی یہ واضح نہیں کہ یہ کامیابی اسرائیلی نگرانی کے نظام کی کمزوری تھی یا پھر کسی تکنیکی خرابی کی وجہ سے ممکن ہوئی۔

کاروان الصمود جس میں درجنوں کشتیوں نے شرکت کی، ستمبر کے آغاز میں اسپین کے شہر بارسلونا سے روانہ ہوا تھا۔ اس عالمی بیڑے میں 40 ممالک کے 500 سے زائد کارکن شامل ہیں، جو فریڈم فلوٹیلا کولیشن گلوبل غزہ موومنٹ اور الصمود جیسے اتحادوں سے وابستہ ہیں۔

گزشتہ ہفتے اس بیڑے نے انکشاف کیا تھا کہ اس کی 9 کشتیوں کو ڈرون حملوں اور دھماکوں کا نشانہ بنایا گیا جس سے کئی جہازوں کو نقصان پہنچا۔ مزید یہ کہ جمعرات کی صبح تک اسرائیلی بحریہ 13 کشتیوں کو ضبط کر چکی تھی اور ان میں موجود کارکنوں کو یورپ واپس بھیجا جا رہا ہے۔

اس سب کے باوجود میکونو-البیرہ کا غزہ میں داخل ہونا انسانی امداد پہنچانے اور کئی برسوں سے جاری محاصرے کو توڑنے کی ایک بڑی کامیابی تصور کی جا رہی ہے۔