الاسکا کے ساحل کے قریب امریکی جنگی طیاروں نے روسی طیاروں کا پھیچا کیا

?️ 20 فروری 2026

الاسکا کے ساحل کے قریب امریکی جنگی طیاروں نے روسی طیاروں کا پھیچا کیا

امریکی حکام نے اعلان کیا ہے کہ روس کے متعدد فوجی طیاروں کو الاسکا کے ساحل کے قریب پرواز کرتے ہوئے دیکھا گیا جس کے بعد امریکی جنگی طیاروں نے انہیں روکا اور علاقے سے باہر جانے تک نگرانی کی۔

شمالی امریکہ کی فضائی دفاعی کمان نے ایک بیان میں کہا کہ روس کے دو ٹی یو 95 بمبار طیارے، دو سوخوئی 35 جنگی طیارے اور ایک اے 50 جاسوس طیارہ الاسکا کے فضائی دفاعی شناختی علاقے میں داخل ہوئے، جن کی فوری طور پر نشاندہی کی گئی۔

بیان کے مطابق امریکی جانب سے دو ایف 16، دو ایف 35 اور چار کے سی 135 طیارے فضا میں بھیجے گئے تاکہ روسی طیاروں کی اس وقت تک نگرانی کی جا سکے جب تک وہ دفاعی شناختی علاقے سے باہر نہ نکل جائیں۔

کمان کے مطابق روسی طیارے نہ تو امریکہ اور نہ ہی کینیڈا کی خود مختار فضائی حدود میں داخل ہوئے۔ حکام نے اس سرگرمی کو معمول کا واقعہ قرار دیتے ہوئے کہا کہ اسے خطرہ نہیں سمجھا گیا۔

الاسکا کا فضائی دفاعی شناختی علاقہ بین الاقوامی فضائی حدود کا وہ حصہ ہے جہاں قومی سلامتی کے تقاضوں کے تحت تمام طیاروں کی شناخت ضروری ہوتی ہے، تاہم یہ علاقہ امریکہ یا کینیڈا کی خود مختار فضائی حدود سے باہر واقع ہے۔

یاد رہے کہ اس سے قبل بھی ایسے واقعات پیش آ چکے ہیں۔ ستمبر 2025 میں امریکی جنگی طیاروں نے روسی طیاروں کی نگرانی کی تھی، جبکہ اگست 2025 میں ایک روسی جاسوس طیارے کو ایک ہفتے میں چار مرتبہ روکا گیا۔ ستمبر 2024 میں جاری ایک ویڈیو میں روسی جنگی طیارہ امریکی طیارے کے قریب پرواز کرتا دکھائی دیا تھا۔

اسی طرح جولائی 2024 میں روس اور چین کے بمبار طیاروں کو بھی الاسکا کے قریب امریکی طیاروں نے روکا تھا، جسے امریکی حکام نے دونوں ممالک کی مشترکہ فضائی سرگرمی کا غیر معمولی واقعہ قرار دیا تھا۔