سچ خبریں:اسلامی جمہوریہ ایران نے افغانستان کے زلزلہ متأثرین کے لیے امداد کی پہلی کھیپ روانہ کر دی ہے۔
اسلامی جمہوریہ ایران کی ہلال احمر کمیٹی کے سکریٹری یعقوب سلیمانی نے ارنا سے گفتگو کرتے ہوئے افغانستان کے زلزلے میں جاں بحق ہونے والوں کے اہلخانہ کو تعزیت پیش کرتے ہوئے کہا کہ شدید زلزلے سے متاثر ہونے والوں کیلئے ہم نے امدادی اشیاء کی پہلی کھیپ میں 400 خیمے اور 800 فرش ارسال کئے۔
انہوں نے کہا کہ امدادی اشیاء کی یہ کھیپ تہران سے ایک فوجی طیارے کے ذریعے ارسال کی گئی جبکہ دوسری کھیپ صوبہ سیستان و بلوچستان کے راستے سے ارسال کی جائے گی جس میں 1200 دری، 600 خیمے اور ایک ہزار غذائی اشیاء پر مشتمل پیکج شامل ہیں۔
واضح رہے کہ افغانستان میں منگل کی شب آنے والے زلزلے سے 1000 افراد جاں بحق اور 1500 زخمی ہوئے ہیں،طالبان نے تمام ملکوں اور اقوام متحدہ سے امدادی اشیاء بھیجنے کی اپیل کی ہے۔
قابل ذکر ہے کہ امریکہ نے افغان متاثرین کے لیے مگر مچھ کے آنسو بہائے ہیں جس کی چین نے رد عمل کا اظہار کرتے ہوئے کہا کہ آپ اس ملک کے منجمد اثاثے رہا کر دیجئے یہی اس ملک میں آنے والے زلزلہ سے متاثر ہونے والوں کی سب سے بڑی مدد ہے۔