سچ خبریں:گزشتہ صبح صیہونی حکومت نے دمشق اور اس کے اطراف میں رہائشی علاقوں پر فضائی حملہ کیا جس میں 20 شامی شہری ہلاک اور زخمی ہوئے۔
اس وحشیانہ جارحیت کے جواب میں کیوبا کے وزیر خارجہ برونو روڈریگز پاریلا نے ٹویٹر پر لکھا کہ کیوبا دمشق پر اسرائیل کے فضائی حملے کی سخت ترین الفاظ میں مذمت کرتا ہے۔
انہوں نے مزید کہا کہ اس فضائی حملے نے شام کی قومی خودمختاری کی خلاف ورزی کی اور یہ ایسی حالت میں ہوا جب اس ملک کے عوام حالیہ زلزلے میں ہزاروں متاثرین کے ساتھ شریک ہیں۔
کیوبا کے وزیر خارجہ نے صیہونی حکومت کی حالیہ جارحیت کو ایک غیر ذمہ دارانہ اقدام قرار دیتے ہوئے کہا کہ اس سے خطے کی سلامتی کو خطرہ لاحق ہو گیا ہے۔
اس سلسلے میں کیوبا کی کمیونسٹ پارٹی کے ایک اعلیٰ عہدیدار ایمیلیو لوساڈا گارسیا نے ٹویٹر پیغام میں شام کے خلاف صیہونی حکومت کے حالیہ حملے کی شدید مذمت کی ہے۔
انہوں نے تاکید کی کہ ایسے حالات میں کہ دوست ملک شام کے عوام حالیہ تباہ کن زلزلے سے پیدا ہونے والے درد و کرب سے دوچار ہیں اس طرح کے حملوں کو انجام دینا انتہائی غیر انسانی فعل تصور کیا جاتا ہے۔
واضح رہے کہ شام کے خلاف صیہونی حکومت کے فضائی حملے میں اتوار کی صبح دمشق اور اس کے مضافات میں کم از کم پانچ رہائشی علاقوں کو نشانہ بنایا گیا جس کے نتیجے میں پانچ شامی شہری ہلاک اور 15 دیگر زخمی ہو گئے۔