اسرائیل جنگ بندی کے بجائے غزہ پر کنٹرول کا منصوبہ بنا رہا ہے

اسرائیل جنگ بندی کے بجائے غزہ پر کنٹرول کا منصوبہ بنا رہا ہے

 صہیونی اخبار اسرائیل ہیوم کی رپورٹ کے مطابق، اسرائیل کے وزیر جنگ اسرائیل کاتس نے غزہ میں جنگ بندی کے بجائے کنٹرول حاصل کرنے کی پالیسی کا عندیہ دیا ہے۔ انہوں نے آج تل ہشومر میں توپخانے اور فضائی دفاعی دستوں کے دورے کے دوران یہ باتیں کہیں۔

کاتس کا کہنا تھا کہ حماس نہ تو جنگ بندی کی شرائط طے کرنے کی پوزیشن میں ہے اور نہ ہی وہ غزہ کے مستقبل کا فیصلہ کرسکتی ہے، اس لیے اسے امریکی تجویز کے حوالے سے لچک دکھانی چاہیے۔

انہوں نے اسرائیلی فوجیوں پر زور دیا کہ وہ حماس کو شکست دینے کی اپنی کوششیں جاری رکھیں۔ ان کا کہنا تھا کہ اگرچہ حملوں کا مقصد حماس کا خاتمہ ہے، لیکن اسرائیلی یرغمالیوں کی موجودگی کی وجہ سے مکمل کامیابی آسان نہیں ہے اور سیکیورٹی کے تقاضوں کو مدنظر رکھنا ہوگا۔

کاتس نے اس بات پر بھی زور دیا کہ جنگ کے بعد اسرائیلی فوج کو غزہ کے اندر اور اردگرد مستقل موجودگی رکھنی چاہیے تاکہ سرحدی علاقوں کی حفاظت کی جا سکے۔ ان کے مطابق اسرائیل کو غزہ میں ویسا ہی سیکیورٹی کنٹرول حاصل کرنا ہوگا جیسا کہ مغربی کنارے (ویسٹ بینک) میں ہے تاکہ فلسطینیوں کی نقل و حرکت اور اسلحے کی اسمگلنگ پر نظر رکھی جا سکے۔

اسی حوالے سے صہیونی میڈیا والانیوز نے اطلاع دی ہے کہ اسرائیلی کابینہ نے ثالثی کرنے والے بین الاقوامی فریقین کو مذاکرات کے لیے ایک حتمی مہلت دینے کا فیصلہ کیا ہے۔

والانیوز کے مطابق وزیر اعظم بنیامین نیتن یاہو نے دھمکی دی ہے کہ اگر حماس نے اس مخصوص وقت تک امریکی تجاویز کو قبول نہ کیا تو اسرائیلی فوج غزہ کے بعض علاقوں کو باقاعدہ اسرائیل میں ضم کرنے کا عمل شروع کر دے گی۔

رپورٹ کے مطابق، اس مقصد کے لیے اسرائیلی کابینہ میں ایک نئی سول و سیکیورٹی اتھارٹی قائم کرنے کی تجویز بھی دی گئی ہے، جو ان علاقوں کا انتظام سنبھالے گی جہاں اسرائیل ضم کرنے کا ارادہ رکھتا ہے۔

دوسری جانب، فلسطینی امریکی تاجر اور مذاکراتی ثالث بشاره بحبح نے العربیہ چینل سے گفتگو کرتے ہوئے انکشاف کیا ہے کہ نیتن یاہو دراصل حماس کے ساتھ سنجیدہ مذاکرات نہیں چاہتے کیونکہ وہ اپنی اتحادی حکومت کو بچانے میں مصروف ہیں، حالانکہ حماس نے ثالثوں کی تجاویز پر مثبت ردعمل دیا ہے اور جلد ہی معاہدے تک پہنچا جا سکتا ہے۔