اسرائیلی فوج کے سربراہ غزہ میں جنگ جاری رکھنے کے خلاف 

سچ خبریں: وال اسٹریٹ جرنل کی رپورٹ کے مطابق، اسرائیلی فوج کے سربراہ جنرل ایال زامیر نے صہیونی کابینہ کو اطلاع دی ہے کہ وہ موجودہ حالات میں اسرائیلی قیدیوں کی رہائی کو ترجیح دیتے ہیں۔

رپورٹ کے مطابق، زامیر نے نیتن یاہو کی کابینہ کو خبردار کیا ہے کہ غزہ میں فوجی آپریشن جاری رکھنے سے اسرائیلی قیدیوں کی جانوں کو شدید خطرہ لاحق ہو سکتا ہے۔ انہوں نے یہ بھی کہا کہ اس جنگ کے نتیجے میں حماس کو مزید کمزور کرنے کے امکانات غیر یقینی ہیں۔

دوسری جانب، امریکی صدر ڈونلڈ ٹرمپ نے گزشتہ رات ایک بیان میں کہا کہ غزہ پٹی کی صورتحال پر مذاکرات آخری مراحل میں ہیں۔ انہوں نے کہا کہ ہم غزہ کے معاملے پر ایک معاہدے کے قریب پہنچ چکے ہیں۔” ٹرمپ نے حماس کے ساتھ بڑی تعداد میں صہیونی قیدیوں کی رہائی کے معاہدے کے امکانات کو زیادہ بتاتے ہوئے کہا کہ حماس کے ساتھ سمجھوتہ ہونے اور بڑی تعداد میں قیدیوں کی رہائی کا بہت امکان ہے۔

تاہم، فلسطینی ذرائع کے مطابق، دوحہ میں اسرائیل اور حماس کے درمیان بالواسطہ جنگ بندی مذاکرات کا پہلا دور بغیر کسی واضح پیشرفت کے ختم ہو چکا ہے۔ یہ مذاکرات نیتن یاہو کے امریکا کے دورے سے پہلے ہوئے ہیں، جو ٹرمپ کے دوبارہ صدر بننے کے بعد ان کا تیسرا دورہ ہوگا۔

حماس نے قطر کے 60 دنوں کی جنگ بندی، 10 صہیونی قیدیوں کی رہائی، اور 18 دیگر قیدیوں کی لاشوں کی واپسی کے بدلے میں غزہ کی سرحدوں پر اسرائیلی فوجیوں کے انخلا اور وسیع پیمانے پر انسانی امداد کی فراہمی کے تجویز پر ابتدائی طور پر مثبت ردعمل ظاہر کیا تھا۔