سچ خبریں:یوکرائن کی پارلیمنٹ کے رکن نے ایک اسرائیلی میڈیا کو انٹرویو دیتے ہوئے کہا کہ انہیں اسرائیلی فوج میں خدمات انجام دینے پر فخر ہے اور وہ اس وقت یوکرائنی پارلیمنٹ کے رکن کے طور پر کام کر رہے ہیں۔
یوکرائنی پارلیمنٹ کے رکن الیگزینڈر کونیتسکی نے صیہونی ٹیلی ویژن چینل کو انٹر ویو دیتے ہوئے اپنی پناگاہ کا ذکر کیا اور کہا کہ اسرائیل میں ہر کوئی میزائلوں اور پناہ گاہوں سے واقف ہے، میں اسرائیل میں رہ چکا ہوں اور ان چیزوں کو اچھی طرح جانتا ہوں۔
عبرانی زبان کے چینل کی ویب سائٹ کے مطابق، الیگزینڈر کونیتسکی نے (مقبوضہ فلسطین) ہجرت کرنے کے بعد اسرائیلی فوج میں خدمات انجام دیں اور پھر یوکرائن واپس آئے اور اس ملک کی پارلیمنٹ ممبر کے طور پر منتخب ہوئے۔
دوسری جانب صیہونی اخبار Yedioth Ahronoth نے اطلاع دی ہے کہ اسرائیلی رضاکاروں کی ایک فوجی یونٹ یوکرائن کی فوج کے ڈھانچے میں لڑ رہی ہے،عبرانی زبان کے ذرائع ابلاغ کے مطابق گولانی جیسی خصوصی یونٹوں میں شامل متعدد صیہونی فوجی اس وقت یوکرائن روس جنگی محاذ کے اگلے مورچوں پر روسی فوجیوں سے لڑ رہے ہیں۔
اخبارنے مزید کہاکہ آج یوکرائن کی خصوصی افواج میں اسرائیلی فوجیوں کی ایک قابل ذکر تعداد روسی فوج سے لڑ رہی ہے۔
