اسرائیلی حملوں کے بعد خلیجی خطے میں فوجی و سیاسی تناؤ میں اضافہ:روسی وزیر خارجہ

اسرائیلی حملوں کے بعد خلیجی خطے میں فوجی و سیاسی تناؤ میں اضافہ

 روسی وزیرِ خارجہ سرگئی لاوروف نے کہا ہے کہ قطر میں اسرائیلی جارحیت کے بعد مشرقِ وسطیٰ (مغربی ایشیا) میں فوجی اور سیاسی تناؤ خطرناک حد تک بڑھ گیا ہے۔

خبر رساں ایجنسی ریانووستی کے مطابق، لاوروف نے جمعرات کو سوچی میں روس اور خلیجی تعاون کونسل (GCC) کے وزرائے خارجہ کے مشترکہ اجلاس میں خطاب کرتے ہوئے کہا کہ اسرائیل کی حالیہ کارروائیاں اس بات کی عکاسی کرتی ہیں کہ تل ابیب فلسطینی ریاست کے قیام کے امکانات کو کمزور کرنے پر تُلا ہوا ہے۔

روسی وزیرِ خارجہ نے واضح کیا کہ اسرائیل کی جانب سے حماس کے رہنماؤں کو قطر میں نشانہ بنانا نہ صرف خطرناک پیشرفت ہے بلکہ اس نے خطے کے فوجی و سیاسی حالات کو مزید پیچیدہ بنا دیا ہے۔

یاد رہے کہ سوچی میں ہونے والے اس اجلاس میں روس اور خلیجی ممالک کے وزرائے خارجہ دوطرفہ تعاون اور اسٹریٹجک تعلقات کے فروغ پر بھی تبادلہ خیال کر رہے ہیں۔