اسرائیلی آرمی چیف کا اعتراف، غزہ کی جنگ مہنگی پڑی

اسرائیلی آرمی چیف کا اعتراف غزہ کی جنگ مہنگی پڑی

 اسرائیلی فوج کے سربراہ جنرل ایال زامیر نے اعتراف کیا ہے کہ غزہ میں جاری جنگ صہیونی ریاست کو بھاری قیمت چکوانے پر مجبور کر رہی ہے۔ انہوں نے دعویٰ کیا کہ اسرائیل کی ایران کے ساتھ جنگ بھی ابھی ختم نہیں ہوئی۔

الجزیرہ کے مطابق، اسرائیلی آرمی چیف نے منگل کو ایک اسٹریٹجک جائزہ اجلاس میں کہا: "غزہ کی جنگ، اسرائیل کی تاریخ کی سب سے پیچیدہ جنگوں میں سے ایک ہے۔ ہم اپنے جنگی اہداف جیسے قیدیوں کی واپسی اور حماس کا خاتمہ حاصل کرنے کی کوشش جاری رکھے ہوئے ہیں۔”

جنرل زامیر نے مزید کہا کہ ایران سے جنگ ابھی ختم نہیں ہوئی۔ ان کا یہ دعویٰ ایسے وقت پر سامنے آیا ہے جب علاقائی اور بین الاقوامی ذرائع، بشمول عربی اخبار رای الیوم، لکھ چکے ہیں کہ اسرائیل ایران کی طاقتور میزائل صلاحیت اور دفاعی قوت کے سبب ۱۲ روزہ جنگ میں جنگ بندی پر مجبور ہوا۔

ادھر اسرائیلی اخبار معاریو نے منگل کو لکھا: "ہم مذاکراتی سطح ہو یا بین الاقوامی، ہر جگہ الجھن اور بے سمتی کا شکار ہیں۔” اخبار نے مزید کہا: "امریکی حکام اب کھل کر کہہ رہے ہیں کہ اسرائیل کو جنگ جاری رکھنے کا کوئی نمایاں جواز باقی نہیں رہا۔”

اسرائیلی اخبار یدیعوت آحارنوت کے مطابق، غزہ میں جاری زمینی کارروائیوں اور اکتوبر 2023 کے حملے میں ناکامی کے بعد، اسرائیلی فوج جلد اپنی آپریشنل حکمت عملی، تیاری کی سطح، اور غزہ کے مکمل کنٹرول کے منصوبے کے فقدان پر اندرونی تحقیقات کا آغاز کرے گی۔

اخبار نے لکھا کہ اس تحقیق میں خاص توجہ حماس کی مزاحمتی طاقت، اسرائیلی قیدیوں کی بازیابی میں ناکامی، اور غزہ کے زیرزمین سرنگوں کے خلاف جنگی تیاریوں پر دی جائے گی۔ کئی فوجی کمانڈروں نے آپریشنز پر سخت تنقید کی ہے۔ رپورٹ کے مطابق، یہ تحقیقات ایک سال تک جاری رہ سکتی ہیں۔