آسٹریلیا میں ہزاروں لوگوں نے اسرائیل پر پابندیاں عائد کرنے کا مطالبہ کیا 

آسٹریلیا میں ہزاروں لوگوں نے اسرائیل پر پابندیاں عائد کرنے کا مطالبہ کیا

غزہ میں اقوامِ متحدہ کی جانب سے قحطی کی باضابطہ تصدیق کے بعد، آسٹریلیا کے درجنوں شہروں میں ہزاروں افراد سڑکوں پر نکل آئے اور فلسطینی عوام سے یکجہتی کا اظہار کرتے ہوئے اسرائیل کے بائیکاٹ اور اسلحے کی برآمدات روکنے کا مطالبہ کیا۔

آسٹریلوی نشریاتی ادارے ایس بی ایس نیوز کے مطابق، سب سے بڑی ریلی بریزبن میں نکالی گئی جسے اس شہر کی تاریخ کا سب سے بڑا مظاہرہ قرار دیا گیا۔ عدالت کے حکم پر احتجاج کا راستہ بدلا گیا لیکن اس کے باوجود مرکزی شاہراہیں بند ہوگئیں۔

مظاہرے سے خطاب کرتے ہوئے انسانی حقوق کے کارکنان اور سیاسی رہنماؤں نے اسرائیل کے خلاف پابندیاں عائد کرنے، اسلحے کی تجارت ختم کرنے اور فلسطین کے حق میں عالمی دباؤ بڑھانے کا مطالبہ کیا۔ فریڈرل گرین پارٹی کی رہنما لاریسا واٹرز اور سینیٹر مول ہالینڈ نے بھی مظاہرے میں شرکت کی اور اسرائیل کو F-35 طیاروں کے پرزے فراہم کرنے پر حکومت پر کڑی تنقید کی۔

اس ملک گیر احتجاج کو حقوقِ بشر، ایمنسٹی انٹرنیشنل اور 250 سے زائد سماجی و مزدور تنظیموں کی حمایت بھی حاصل رہی۔ ایمنسٹی نے اسرائیل پر نسل کشی اور جنگی جرائم کا الزام لگاتے ہوئے آسٹریلیا سے اسلحہ کی فراہمی فوری روکنے کا مطالبہ کیا۔

سڈنی، ملبورن، پرتھ، کینبرا، ایڈیلیڈ اور دیگر بڑے شہروں میں بھی بڑی تعداد میں لوگ سڑکوں پر نکلے۔ کچھ شہروں میں یہ اپنی نوعیت کا پہلا فلسطین کے حق میں مظاہرہ تھا۔شرکاء نے غزہ میں بھوک اور انسانی بحران کو فوری طور پر ختم کرنے اور اسرائیلی جارحیت روکنے کے لیے عالمی برادری سے مؤثر اقدامات کا مطالبہ کیا۔