کیا ایران امریکہ معاہدہ آبنائے ہرمز سے ہو کر گزرتا ہے؟

?️ 21 جون 2026

سچ خبریں:رشیا ٹوڈے کے مطابق آبنائے ہرمز کی صورتحال ایران اور امریکہ کے درمیان مفاہمتی یادداشت کے بعد بھی غیر واضح اور کشیدہ بنی ہوئی ہے۔

 رشیا ٹوڈے کے مطابق ایران اور امریکہ کے معاہدے کے بعد آبنائے ہرمز کی صورتحال اب بھی غیر واضح ہے، جہاں تہران بندش کا دعویٰ کر رہا ہے جبکہ واشنگٹن تیل کی ترسیل جاری ہونے کا کہہ رہا ہے۔

رپورٹ میں کہا گیا ہے کہ جہاں تہران کا مؤقف ہے کہ آبنائے ہرمز بند ہے، وہیں واشنگٹن کا دعویٰ ہے کہ تیل کی ترسیل معمول کے مطابق جاری ہے۔

تفصیلات کے مطابق ایران اور امریکہ کے درمیان مذاکراتی وفود سوئٹزرلینڈ میں آئندہ مذاکرات کے لیے روانہ ہو چکے ہیں، تاہم اس دوران دونوں جانب سے اس اہم آبی گزرگاہ کی صورتحال پر متضاد بیانات سامنے آ رہے ہیں۔

امریکی صدر ڈونلڈ ٹرمپ نے معاہدے کے بعد آبنائے ہرمز کے فوری کھلنے اور تیل کی ترسیل جاری ہونے کا دعویٰ کیا، جبکہ تہران کے مرکزی بیس خاتم الانبیاء نے اعلان کیا کہ آبنائے ہرمز بند ہے اور پاسداران انقلاب نے بحری جہازوں کو خبردار کیا ہے۔

اس کے برعکس امریکی نائب صدر جے ڈی وینس نے دعویٰ کیا کہ آبنائے ہرمز سے آمد و رفت مکمل طور پر بند نہیں ہوئی اور روزانہ بڑی مقدار میں تیل منتقل ہو رہا ہے۔

امریکی سینٹکام کے مطابق تجارتی جہازوں کی آمد و رفت میں اضافہ ہوا ہے اور کم از کم پچپن جہاز اس راستے سے گزر چکے ہیں۔

اعداد و شمار کے تجزیاتی ادارے کپلر کے مطابق حالیہ دنوں میں درجنوں جہاز آبنائے ہرمز سے گزرے ہیں، جن میں سعودی عرب کے تیل بردار جہاز اور بعض پابندیوں کا شکار ایرانی جہاز بھی شامل ہیں۔

مارین ٹریفک کے اعداد و شمار کے مطابق ایک دن میں 25 آئل ٹینکرز آبنائے ہرمز سے گزرے، جبکہ اگلے دن یہ تعداد کم ہو کر سنگل ڈیجٹ میں آ گئی۔

سوئٹزرلینڈ میں مذاکرات اور لبنان کا معاملہ

ایران اور امریکہ کے درمیان تکنیکی مذاکرات ایک مختصر تاخیر کے بعد اتوار کو سوئٹزرلینڈ میں شروع ہونے جا رہے ہیں۔ ایرانی وفد کی قیادت عباس عراقچی اور محمد باقر قالیباف کر رہے ہیں۔

تہران کا کہنا ہے کہ ان مذاکرات کا بنیادی مقصد امریکہ کی ذمہ داریوں کے نفاذ کی وضاحت حاصل کرنا ہے۔

معاہدے کے اہم نکات میں یہ بھی شامل ہے کہ تمام محاذوں پر جنگ کا خاتمہ ہو، بشمول لبنان، اور ایران کا مؤقف ہے کہ کسی بھی شق کی خلاف ورزی پورے معاہدے کو متاثر کرے گی۔

اسرائیل کے لبنان پر حملے جاری

امریکہ اور ایران کے معاہدے کے باوجود اسرائیل نے لبنان پر حملے جاری رکھے ہیں۔

لبنان کی وزارت صحت کے مطابق صرف جمعہ کی رات شدید فضائی حملوں میں 47 افراد شہید ہوئے۔

صیہونی وزیراعظم بنیامین نیتن یاہو نے مؤقف اختیار کیا ہے کہ صیہونی افواج جنوبی لبنان میں اس وقت تک موجود رہیں گی جب تک ضروری سمجھا جائے۔

اسرائیل کے وزیر برائے داخلی سلامتی اتمار بن گویر نے بھی کہا ہے کہ اسرائیل ٹرمپ معاہدے کا پابند نہیں۔

اس مؤقف نے امریکہ اور اسرائیل کے تعلقات میں کشیدگی پیدا کر دی ہے جبکہ امریکی نائب صدر جے ڈی وینس سمیت بعض امریکی حکام نے لبنان میں طاقت کے زیادہ استعمال پر اسرائیل کو تنقید کا نشانہ بنایا ہے۔

امریکی انٹیلیجنس ذرائع کے مطابق نیتن یاہو داخلی سیاسی بقا کے لیے ممکنہ طور پر انتخابات سے قبل حزب اللہ کے ساتھ کشیدگی میں اضافہ کر سکتے ہیں۔