چین کی دہلی پر نظر، انڈیا اور پاکستان کے درمیان مکمل جنگ کا امکان کم

سچ خبریں:ہندوستان کے سیاسی امور کے ایک ماہر نے یوریشیائی خطے میں موجودہ کشیدگیوں کا حوالہ دیتے ہوئے کہا ہے کہ موجودہ حالات میں ہند و پاکستان کے درمیان مکمل جنگ کے امکانات نہایت کمزور ہیں کیونکہ دہلی کی حکومت اس وقت کسی بڑے فوجی تصادم کی متحمل نہیں ہو سکتی۔

حالیہ مہینوں میں برصغیر میں ہونے والی سیاسی و عسکری تبدیلیوں نے ایک بار پھر دنیا کی توجہ اس خطے کی طرف مبذول کر دی ہے۔ ہندوستان اور پاکستان، جو کہ عشروں سے باہمی کشیدگی اور تنازعات کا شکار رہے ہیں، اب ایسے چیلنجز کا سامنا کر رہے ہیں جو صرف دو طرفہ تعلقات کو ہی نہیں بلکہ پورے خطے کی سلامتی اور بین الاقوامی سیاست کو بھی متاثر کر سکتے ہیں۔

کشمیر کا مسئلہ، جو ہند و پاکستان کے درمیان سب سے اہم تنازع رہا ہے، اب ایک پیچیدہ اور کثیر الجہتی بحران کی شکل اختیار کر چکا ہے۔ حالیہ جغرافیائی تبدیلیوں، خاص طور پر بھارت کی امریکہ کے ساتھ بڑھتی ہوئی عسکری و اقتصادی شراکت داری، داخلی سطح پر دہشت گرد حملے اور عدم استحکام، اس بحران کو مزید گہرا کر رہے ہیں۔

ترکی کے ایک ماہر سیاسیات نے مسئلہ کشمیر کے حل نہ ہونے کی وجوہات، دہشت گردی کے حملوں کے اثرات اور ممکنہ فوجی تصادم کے نتائج پر روشنی ڈالی ہے۔

تجزیہ کار: مسئلہ کشمیر اس لیے حل نہیں ہو سکا کیونکہ دونوں ممالک اس پر مکمل دعویٰ رکھتے ہیں اور کسی قسم کی لچک دکھانے کو تیار نہیں۔ یہ مسئلہ ایک دائمی بیماری کی مانند ہے، جو دونوں ممالک کی سیاسی پالیسیوں میں رچ بس چکا ہے۔ موجودہ صورتحال غالباً ایک کنٹرولڈ بحران  کی صورت میں جاری رہے گی اور مکمل جنگ کا امکان نہایت محدود ہے۔

ہندوستان، کسی بڑے دہشت گردانہ حملے کی صورت میں، ایک محدود اور ہدفی فضائی کارروائی کر سکتا ہے جیسا کہ 2019 کے پلوامہ حملے کے بعد کیا گیا تھا۔ تاہم اس نوعیت کی کوئی کارروائی فوری طور پر متوقع نہیں اور یہ ابھی منصوبہ بندی کے مراحل میں ہیں۔

کشمیر کے ساتھ ساتھ سندھ طاس کے پانیوں کا مسئلہ بھی دونوں ممالک کے درمیان کشیدگی کا سبب بن رہا ہے۔ بھارت، جو دریائے سندھ کے منبع پر واقع ہے، کئی ڈیم تعمیر کر چکا ہے اور پانی کے بہاؤ میں تبدیلیاں لانے کے لیے اقدامات کر رہا ہے جو پاکستان کے لیے نقصان دہ ہو سکتے ہیں۔

یہ صورتحال نہ صرف مسئلہ کشمیر کو پیچیدہ بناتی ہے بلکہ اسے ایک متوازی بحران میں بھی تبدیل کر دیتی ہے جو مستقل کشیدگی کا باعث بن سکتا ہے۔

1965 اور 1971 کی مکمل جنگوں اور کرگل جیسی چھوٹی جھڑپوں کے باوجود، شملہ معاہدہ آج بھی قانونی حیثیت رکھتا ہے۔ معاہدے میں کسی بھی فریق کو یکطرفہ طور پر معاہدہ ختم کرنے یا اس میں تبدیلی کرنے کا اختیار نہیں ہے لہٰذا ہندوستان کی طرف سے اس معاہدے کی معطلی قانونی جواز نہیں رکھتی اور اگر پاکستان اسے بین الاقوامی عدالت لے جائے تو ہندوستان کا موقف کمزور ہو سکتا ہے۔

کشمیر صرف ہندوستان اور پاکستان تک محدود نہیں بلکہ چین بھی اس میں شامل ہے۔ کچھ علاقے ایسے ہیں جن پر چین کی عملداری ہے، اور وہ چین-پاکستان اقتصادی راہداری (CPEC) کے لیے اہم ہیں۔ اگر ہند و پاکستان کے درمیان تنازعہ شدت اختیار کرتا ہے تو اس کا اثر براہ راست CPEC پر بھی پڑے گا۔

چین، جو علاقائی استحکام کا خواہاں ہے، بھارت کے پانیوں پر کنٹرول کے اقدامات کو جواز بنا کر اپنے بھی اقدامات کر سکتا ہے، جیسے تبت کے دریا براهماپوترا یا مکونگ پر اثر انداز ہونا۔ پانی کو بطور ہتھیار استعمال کرنا جنگی جرم کے زمرے میں آ سکتا ہے۔

ہند و پاکستان کے تعلقات ایک نازک موڑ پر ہیں جہاں مسئلہ کشمیر اور سندھ طاس جیسے تنازعات بین الاقوامی طاقتوں کو بھی متاثر کر سکتے ہیں۔ اگرچہ مکمل جنگ کا امکان کم ہے، مگر کشیدگی برقرار رہے گی اور کسی بھی نئی کارروائی کی صورت میں خطے کی سلامتی کو سنگین خطرات لاحق ہو سکتے ہیں۔

تجزیہ کار: 21 اپریل کو جب امریکی نائب صدر نے بھارت کا سرکاری دورہ کیا، اسی دن کشمیر میں ایک دہشت گرد حملہ بھی پیش آیا، تجزیہ کاروں کے مطابق یہ ہم وقتی وقوعہ محض اتفاق نہیں بلکہ ایک اہم اشارہ ہو سکتا ہے۔

 اس وقت بھارت اور امریکہ دونوں بین الاقوامی سطح پر سرگرم عمل تھے۔ بھارت ایک طرف امریکہ کے ساتھ دفاعی و تجارتی تعلقات کو مضبوط بنا رہا تھا اور دوسری جانب سعودی عرب کے ساتھ معاشی شراکت داری کو فروغ دینے میں مصروف تھا۔

یہ حملہ بھارت کو یہ یاد دہانی بھی ہو سکتا ہے کہ ملک کے اندر اب بھی غیر مستحکم عناصر موجود ہیں، اس پہلو پر ان غیر ملکی قوتوں کو بھی توجہ دینے کی ضرورت ہے جو بھارت کے ساتھ تعلقات کو فروغ دے رہی ہیں۔

 بھارتی انٹیلی جنس کے لیے یہ ایک ناکامی مانی جا رہی ہے کیونکہ انہیں اس گروہ کی موجودگی کا علم تھا اور ان پر قابو پانے کی کوششیں جاری تھیں، لیکن معلومات کا کھیل ہمیشہ پیچیدہ ہوتا ہے۔

حیرت کی بات یہ ہے کہ بھارت نے یہ پیش گوئی نہیں کی کہ امریکی نائب صدر کی موجودگی کا فائدہ اٹھا کر دشمن کشمیر کے مسئلے کو عالمی توجہ کا مرکز بنا سکتا ہے اور "معمول” کی تصویر کو خراب کر سکتا ہے۔

بھارت اور پاکستان دونوں جوہری طاقتیں ہیں اور شنگھائی تعاون تنظیم کے رکن ہیں۔ بھارت BRICS گروپ کا بانی رکن ہے جبکہ پاکستان اس میں شمولیت کا خواہشمند ہے۔ چین اور پاکستان کے گہرے تعلقات ہیں اور چین بھارت کے ساتھ BRICS کے تحت اپنے تعلقات کو متوازی طور پر بہتر بنا رہا ہے۔ بھارت کی فوجی طاقت کی ایک بڑی وجہ روسی تعاون ہے۔

ایسے میں اگر دونوں ممالک کے درمیان جنگ چھڑتی ہے تو اس کا اثر نہ صرف برصغیر بلکہ پورے یوریشیا اور مغربی ایشیا پر پڑے گا۔ تاہم موجودہ حالات میں بھارت جنگ کے حق میں نہیں۔ اسے نہ صرف پاکستان بلکہ چین کے ساتھ بھی ماضی میں جنگ کا تجربہ ہے، اور اب وہ جانتا ہے کہ کسی نئی جنگ سے اجتناب بہتر حکمت عملی ہے۔

بھارت کو اس بات کا بھی اندازہ ہے کہ وہ امریکہ پر مکمل انحصار نہیں کر سکتا اور نہ ہی چین سے کھلی محاذ آرائی مول لے سکتا ہے۔ چین اس وقت پاکستان میں سرمایہ کاری کر رہا ہے اور روس کے ساتھ تعلقات بہتر بنا رہا ہے۔ اگر بھارت کی جانب سے جنگ کا آغاز ہوا، تو چین خاموش نہیں بیٹھے گا، جو کہ دہلی کے لیے سب سے بڑا خدشہ ہے۔

اگرچہ امریکہ بھارت کی حمایت کر رہا ہے، لیکن بھارت یہ بھی جانتا ہے کہ اسے مکمل طور پر امریکہ پر انحصار نہیں کرنا چاہیے، کیونکہ ایسا کرنا اسے کمزور پوزیشن میں لا سکتا ہے۔ تجزیہ کاروں کا خیال ہے کہ ہند-پاک جنگ چین کو نقصان پہنچا سکتی ہے اور امریکہ اس سے فائدہ اٹھا سکتا ہے، لیکن یہ مفروضہ ہر ایک کے لیے قابل قبول نہیں۔

ایسی جنگ نہ صرف پاکستان اور چین کو نقصان دے گی بلکہ خود بھارت کو بھی کمزور کرے گی، جب کہ امریکہ کو اس وقت ایک مضبوط بھارت کی ضرورت ہے۔ امریکہ کے لیے بنیادی ترجیح خطے میں استحکام کا قیام اور جیوپولیٹیکل تناؤ سے بچاؤ ہے۔

چین اور بھارت تعلقات کو بہتر بنانے کی کوشش کر رہے ہیں، اور یورپی طاقتیں اور روس بھی فی الحال کسی تصادم کے حق میں نہیں۔ اگرچہ چین نے پاکستان کی حمایت کا اظہار کیا ہے، مگر بڑے پیمانے پر جنگ کی صورت میں کوئی بڑی بین الاقوامی حمایت پاکستان کو حاصل نہیں ہوگی۔

مزید پڑھیں:کشیدگی بڑھانا نہیں چاہتے لیکن حملہ ہوا تو اس سے بڑا جواب دیں گے، وزیر دفاع

آخر میں، بھارت عالمی سطح پر یہ تاثر دینا چاہتا ہے کہ اگر جنگ ہوتی ہے تو اس کا آغاز بھارت نہیں بلکہ پاکستان کرے گا۔ بھارت کی حکمت عملی یہ ہے کہ وہ ایسے اقدامات کرے جو مکمل جنگ نہ ہوں بلکہ ایک محدود اور کنٹرولڈ کشیدگی کے زمرے میں آئیں۔ یوں وہ دنیا کو یہ پیغام دینا چاہتا ہے کہ وہ ذمہ دار ریاست ہے اور جنگ کا خواہاں نہیں، بلکہ استحکام کا حامی ہے۔