ہر وقت پیچھا کرنے پر قیصر نظامانی کو شادی کے لیے رشتہ بھیجنے کا کہا، فضیلہ قاضی

?️ 13 مارچ 2025

کراچی: (سچ خبریں) سینئر اداکارہ فضیلہ قاضی نے انکشاف ہے کہ ہر وقت پیچھا کرتے رہنے پر ہی انہوں نے تنگ آکر اپنے شوہر قیصر نظامانی کو کہا تھا کہ اگر وہ انہیں اتنی ہی پسند ہیں تو ان کا رشتہ مانگنے آئیں۔

فضیلہ قاضی نےحال ہی میں ’مذاق رات‘ میں شرکت کی، جہاں انہوں نے اپنی شادی کا قصہ بھی بیان کیا۔

انہوں نے بتایا کہ انہوں نے شوہر قیصر نطامانی سے قبل ہی اداکاری کا آغاز کردیا تھا اور ان دونوں کی پاکستان ٹیلی وژن (پی ٹی وی) پر ملاقاتیں ہوتی رہتی تھیں۔

ان کے مطابق قیصر نظامانی نے سندھی جب کہ انہوں نے اردو ڈراموں سے کیریئر کا آغاز کیا، ان کی والدہ کو قیصر نظامانی بہت پسند تھے اور وہ ان سے ملاقات کرنا چاہتی تھیں۔

انہوں نے بتایا کہ ایک دن ٹی وی پروگرام کی میزبانی کرتے وقت انہوں نے قیصر نظامانی کو بتایا کہ ان کی والدہ ان سے ملاقات کرنا چاہتی ہیں، وہ ان کے ڈرامے بڑے شوق سے دیکھتی ہیں۔

فضیلہ قاضی کے مطابق قیصر نظامانی آئے روز کبھی ان کے بھائیوں سے ملنے کے بہانے یا کسی اور بہانے سے انہیں دیکھنے گھر آجایا کرتے تھے۔

انہوں نے بتایا کہ یہاں تک قیصر نظامانی ہر اس شوٹنگ سیٹ پر بھی پہنچ جاتے تھے، جہاں ان کی شوٹنگ ہو رہی ہوتی تھی۔

اداکارہ کا کہنا تھا کہ ایک بار قیصر نظامانی انہیں کسی ڈرامے کی ریہرسل کے بعد گھر چھوڑنے آئے تو انہوں نے دوستوں کو فون کرکے بتایا کہ وہ فضیلہ قاضی کو گھر چھوڑنے گئے تھے۔

اداکارہ کے مطابق قیصر نظامانی کے ہر شوٹنگ سیٹ پر ان کے پیچھے پیچھے آنے سے تنگ آکر انہوں نے انہیں رشتہ بھیجنے کا کہا۔

ان کا کہنا تھا کہ انہوں نے ہونے والے شوہر کو بتایا کہ انہیں یہ سب کچھ اچھا نہیں لگتا، اگر انہیں وہ اتنی ہی پسند ہیں تو ان کے گھر رشتہ بھیجیں۔

انہوں نے بتایا کہ ان کی بات پر قیصر نظامانی راضی ہوگئے اور انہیں امید نہیں تھی کہ وہ ایسا کریں گے۔

فضیلہ قاضی کا کہنا تھا کہ قیصر نظامانی تو فوری طور پر شادی کے لیے رضامند ہوگئے لیکن ان کے گھر والے شادی کے لیے راضی نہیں ہوئے اور ان کی شادی ہونے کافی وقت لگا۔

ان سے قبل قیصر نظامانی بھی بتا چکے ہیں کہ ان کے اور فضیلہ قاضی کے خاندان والے ایک دوسرے کے سیاسی دشمن تھے، اس لیے ان کی شادی نہیں ہو پا رہی تھی لیکن چند سال کی کوششوں کے بعد ان کی شادی ہوگئی۔

دونوں اداکاروں کا شمار شوبز کی مقبول اور خوبصورت ترین جوڑیوں میں ہوتا ہے، دونوں کے بچے بھی ہیں اور ان کے بڑے بیٹے نے بھی شادی کرلی ہے۔