کرکٹرز بہت میسیج بھیجتے ہیں، انہیں ایسا نہیں کرنا چاہیے، نوال سعید

?️ 14 اکتوبر 2023

کراچی: (سچ خبریں) ماڈل، گلوکارہ و اداکارہ نوال سعید نے دعویٰ کیا ہے کہ متعدد معروف کرکٹرز انہیں اپنے ویریفائیڈ انسٹاگرام اکاؤنٹس سے انہیں میسیجز بھیجتے ہیں، جنہیں پڑھ کر وہ حیران رہ جاتی ہیں۔

اداکارہ نے حال ہی میں کامیڈی شو ’حد کردی‘ میں شرکت کی، جہاں انہوں نے مختلف معاملات پر بات کرنے کے علاوہ شوبز پر بھی بات کی۔

اداکارہ نے بتایا کہ انہوں نے حال ہی میں اپنا کلاتھنگ برانڈ متعارف کرایا ہے، جہاں انہوں نے لباس کی قیمت کم رکھی ہے اور ان کے لباس کی قیمت 9 ہزار روپے سے شروع ہوتی ہے۔

پروگرام میں بات کرتے ہوئے انہوں نے بتایا کہ کیریئر کے آغاز میں بطور خاتون انہیں مشکلات پیش ضرور آئیں لیکن جلد ہی انہیں وہ مقام مل گیا جو انہیں ملنا چاہئیے۔

ان کے مطابق شروعات میں انہیں شوبز کے حوالے سے کام کرنے کا کوئی تجربہ نہیں تھا، اس لیے مشکلات پیش آئیں اور انہوں نے اپنا مقام بنانے کے لیے محنت کی۔

اداکارہ کا کہنا تھا کہ انہوں نے کبھی سوچا نہیں تھا کہ وہ اتنی مشہور اداکارہ بن جائیں گی، اس لیے انہوں نے گلوکاری شروع کرنے کے فوری بعد ہی ماڈلنگ اور اداکاری شروع کردی۔

انہوں نے انکشاف کیا کہ آغاز میں ماڈلنگ کے دوران متعدد اشتہارات کی ویڈیوز میں انہیں ایک سے دو سیکنڈ تک دکھایا گیا جب کہ اشتہارات کی شوٹنگ 12 سے 14 گھنٹوں تک چلتی رہی۔

نوال سعید کے مطابق اگرچہ اشتہارات میں انہیں کم دکھایا گیا لیکن اس باوجود انہیں مکمل معاوضہ دیا گیا۔

سوشل میڈیا پر خود سے متعلق جھوٹی خبریں پھیلنے کے معاملے پر بات کرتے ہوئے انہوں نے انکشاف کیا کہ کچھ عرصہ قبل انہوں نے اداکار نور حسن کے ساتھ برائیڈل شو کروایا تو اداکار کے والدین کو ان کے رشتے داروں نے فون کرکے بیٹے کی شادی کی مبارک باد دی اور شکوہ کیا کہ انہیں شادی پر کیوں نہیں بلایا گیا۔

اداکارہ کے مطابق ایسے ہی ان کی برائیڈل شوٹ کی تصاویر کو وائرل کرکے ان کی شادی کی جھوٹی خبریں پھیلائی جاتی رہی ہیں۔

اسی طرح انہوں نے بتایا کہ حال ہی میں ڈراما ’داغ دل‘ کی شوٹنگ کے دوران ان کا چہرہ انفیکشن کی وجہ سے خراب ہوگیا، جس پر سوشل میڈیا پر ان کی رنگت اور چہرے سے متعلق منفی باتیں پھیلائی گئیں۔

شادی سے متعلق پوچھے گئے سوال پر انہوں نے کہا کہ وہ کسی نہ کسی دن ضرور شادی کریں گی لیکن ابھی ان کا کوئی ارادہ نہیں۔

اداکارہ کے مطابق لڑکے کو پہلے انہیں راضی کرنا ہوگا اور انہیں یقین دلانا ہوگا، اس کے بعد ہی ان کے والدین ان کے لیے رشتے کی بات کریں گے۔

سوشل میڈیا پر پیغامات آنے کے حوالے سے پوچھے گئے سوال پر اداکارہ نے دعویٰ کیا کہ انہیں اداکاروں نہیں بلکہ پاکستانی کرکٹرز کے بہت میسیجز آتے ہیں۔

نوال سعید نے دعویٰ کیا کہ متعدد کرکٹرز انہیں اپنے تصدیق شدہ انسٹاگرام اکاؤنٹس سے انہیں میسیجز بھیجتے ہیں، جن میں زیادہ تر ان کی خوبصورتی کی تعریفیں ہوتی ہیں۔

ان کے مطابق وہ کرکٹرز کے پیغامات پڑھ کر حیران رہ جاتی ہیں کہ وہ عالمی سطح پر پاکستان کی نمائندگی کرنے والے لوگ بھی ایسا کر سکتے ہیں اور انہیں ایسا نہیں کرنا چاہئیے۔

اگرچہ انہوں نے کسی کرکٹر کا نام نہیں بتایا تاہم دعویٰ کیا کہ انہیں کرکٹرز کے بہت میسیجز آتے ہیں، جنہیں پڑھ کر وہ حیران رہ جاتی ہیں۔