ممبئی (سچ خبریں) بالی وڈ اسٹار سلمان خان نے اہم انکشاف کیا ہے کہ ان کے خاندان کے کچھ افراد بھی کورونا کا شکار ہوچکے ہیں۔ان کا کہنا تھا کہ کورونا نے ہمارے گھر بہت سے افراد کو متاثر کیا، کورونا کی دوسری لہر بہت خطرناک ہے اب تک ہم سنتے آ رہے تھے لیکن اب ہم نے خود دیکھا ہے۔
بھارتی میڈیا سے گفتگو کے دوران سلمان خان نے انکشاف کیا کہ ان کی منہ بولی بہنیں ارپیتا خان شرما اور الویرا اگنی ہوتری کورونا میں مبتلا ہوچکی ہیں تاہم ان کی بہنوں میں کورونا وائرس کی کوئی علامات نہیں۔
بالی وڈ اسٹار کا کہنا تھا کہ کورونا کی دوسری لہر خطرناک ہے، اب تک ہم سنتے آئے تھے کہ فلاں کو کورونا ہوگیا ہے لیکن اب ہمارے اہل خانہ بھی اس سے متاثر ہوگئے ہیں، آخری بار کورونا نے ہمارے گھر کے ڈرائیورز کو متاثر کیا تھا مگر اب اس نے بہت سے لوگوں کو متاثر کیا ہے۔
خیال رہے کہ اس سے قبل سلمان خان کی بہن ارپیتا خان بھی اپنے ایک بیان میں انکشاف کرچکی ہیں کہ وہ اپریل میں کورونا کا شکار ہوکر صحتیاب ہوچکی ہیں۔بھارت میں کورونا کی دوسری لہر کے دوران متعدد بالی وڈ شخصیات کورونا کا شکار ہوچکی ہیں جب کہ ان میں سے کئی کورونا کے باعث انتقال بھی کرگئی۔
دوسری جانب عالمی ادارہ صحت (ڈبلیو ایچ او)نے کورونا کی بھارتی قسم کو عالمی سطح پر تشویش کا باعث قرار دے دیا۔غیر ملکی میڈیا کے مطابق امریکی ماہر وبائی امراض ڈاکٹر انتھونی فائوچی نے مودی سرکار سے ہٹ دھرمی چھوڑنے کا مطالبہ کردیا ،انتھونی فائوچی کا کہنا تھا کہ بھارت ملک بھر میں لاک ڈان اورلوگوں کو ویکسین فراہم کرے۔
