دوسری شادی سے قبل پہلی بیوی کی اجازت ضروری نہیں، صائمہ قریشی

?️ 9 فروری 2025

کراچی: (سچ خبریں) سینئر اداکارہ صائمہ قریشی کے دوسری شادی کے حق میں بیان سے سوشل میڈیا پر نئی بحث کا آغاز ہو گیا ہے۔

صائمہ قریشی حال ہی میں ’ایف ایچ ایم‘ پوڈ کاسٹ میں شریک ہوئیں، جہاں انہوں نے دیگر موضوعات کے ساتھ خواتین کے گھر چلانے پر بھی بات کی۔

ان کا کہنا تھا کہ کوئی مانے یا نہ مانے لیکن برکت مرد ہی کی کمائی میں ہوتی ہے۔

انہوں نے عورت کی کمائی کا ذکر کرتے ہوئے کہا کہ جب عورت گھر چلانا شروع کردیتی ہے تو یہ اس کی سرشت میں شامل ہے کہ وہ ضرور جتاتی ہے۔

اداکارہ نے دوسری شادی کے حق میں بات کرتے ہوئے کہا کہ مرد کو دوسری شادی کرنے سے قبل پہلی بیوی کی اجازت کی ضرورت نہیں ہے۔

ان کا کہنا تھا کہ اسی لیے کہا گیا ہے کہ نکاح عام ہونے سے بےحیائی کا خاتمہ ہوجائے گا۔

انہوں نے کہا کہ کون کہتا ہے دوسری شادی سے پہلے بیوی کی اجازت لی جائے۔

دوسری شادی کرنے والے مرد پر ہونے والی تنقید کے حوالے سے ان کا کہنا تھا کہ کسی نہ کسی کو تو اس سوچ کے خلاف آواز اٹھانی ہوگی۔

اداکارہ کے مطابق معاشرے کے خلاف جاکر حق کا ساتھ دینا چاہیے اور غلط کو غلط کہنا بھی ضروری ہے۔

صائمہ قریشی نے مردوں کو مخاطب کرتے ہوئے کہا کہ اگر آپ دوسری شادی کرتے ہیں تو اسے چھپانے کی ضرورت نہیں،اس کا اعلان اور اسے تسلیم کریں۔

ان کا کہنا تھا کہ اگر کسی شادی شدہ آدمی کو کوئی لڑکی پسند آجائے تو غیر ازدواجی تعلقات رکھنے سے بہتر ہے کہ نکاح کرلیا جائے۔

اداکارہ کے انٹرویو کی ہائی لائٹس نے سوشل میڈیا صارفین میں ایک نئی بحث چھیڑ دی ہے۔

بہت سے صارفین اداکارہ کی بات سے متفق نظر نہیں آرہے۔

ان کا خیال ہے کہ پاکستان میں دوسری شادی کو منفی طور پراس لیے دیکھا جاتا ہے کیوں کہ مرد دونوں خاندانوں کے درمیان توازن قائم نہیں کر سکتے۔

جب کہ کچھ صارفین اداکارہ کے خواتین کی کمائی کے خلاف بیان پر بھی تنقید کرتے دکھائی دے رہے ہیں۔