اداکارہ اُشنا شاہ جانوروں کو قید کرنے کے خلاف ہیں

?️ 12 اپریل 2021

کراچی (سچ خبریں) پاکستانی اداکارہ اشنا شاہ کو جانوروں کوقید کرنا یا انہیں پنجرے میں بند کرنا بالکل پسند نہیں ہے اور وہ اس چیز کے خلاف ہیں انہوں  نے ایک گھر میں مرغیوں کو ہر وقت پنجرے میں بند رکھنے پر دکھ کا اظہار کرتے ہوئے کہا ہے کہ کوئی بھی جرم کیے بغیر انتہائی خراب جیل میں زندگی گزارنے سے بہتر جلد موت ہوگی۔

جانوروں سے بہت زیادہ محبت کرنے والی اشنا شاہ نے انسٹاگرام پر آنکھوں دیکھے گئے واقعے سے متعلق بتایا کہ ایک سیٹ پر مرغیوں کو دیکھ کر میرا دل ٹوٹ گیا۔ مرغیوں کا مالک دن رات انہیں پنجرے میں بند رکھتا ہے۔ گھر کا مالک چوری ہوجانے کے خوف سے انہیں باہر نہیں نکالتا۔

اداکارہ نے مزید لکھا کہ میں جانتی ہوں کہ دیگر لوگ بھی اپنے گھروں میں مرغیوں کو پنجرے میں بند رکھتے ہیں۔ ان کا کہنا تھا کہ  تصور کیجئے کہ مرغیوں کو رات دن پنجرے میں قید رکھنا انہیں کیسا لگتا ہوگا۔اشنا شاہ نے سوال اٹھایا کہ مرغیوں کو استعمال کرنا ایک چیز لیکن کیا ساری زندگی ہم ان کو تکلیف دیں گے۔ ان کا کہنا تھا کہ  میں تمام جانوروں اور پرندوں کے لئے بولتی ہوں جنہیں باندھا یا قید کیا جاتا ہے۔

واضح رہے کہ گزشتہ ماہ اشنا شاہ اور ڈبلیو ڈبلیو ایف پاکستان کے درمیان ایک معاہدے پر دستخط بھی ہوئے تھے۔ ڈبلیو ڈبلیو ایف کے ترجمان کا اس حوالے سے کہنا تھا کہ اُشنا جانوروں اور ماحولیات کے تحفظ کیلئے بات کریں گی۔

اس سے قبل ماحولیات کے حوالے سے ان کا کہنا تھا کہ ہرشخص کو آب و ہوا میں بدلاؤ کے مضر اثرات سے نمٹنے کے لیے درخت لگانے کا عہد کرنا ہوگا۔ماحول کے بارے میں لوگوں کے رویوں کو تبدیل کرنے کی ضرورت ہے۔اشنا شاہ کا کہنا تھا کہ پاکستان نایاب جنگلی حیات سے مالامال ہے۔ چیتے، دریائے سندھ کی ڈالفن کی مختلف اقسام ہماری ملک میں پائی جاتی ہیں۔