پی ٹی آئی کے سیکریٹری جنرل مستعفی

?️ 29 جون 2024

سچ خبریں: عمر ایوب نے پاکستان تحریک انصاف (پی ٹی آئی) کے سیکریٹری جنرل اور پارٹی کے چیئرمین مرکزی فنانس بورڈ کے عہدوں سے استعفیٰ دے دیا ہے۔

عمر ایوب نے اپنے استعفیٰ کا خط ’ایکس‘ پر پوسٹ کیا ہے۔

عمر ایوب کے مطابق، انہوں نے 22 جون کو اپنا استعفیٰ پارٹی چیئرمین کو بھیجا تھا اور وہ قومی اسمبلی میں قائد حزب اختلاف کی حیثیت سے اپنی ذمہ داریاں بہتر طریقے سے نبھانا چاہتے ہیں۔

یہ بھی پڑھیں: عوام اور ملک کے مستقبل کے ساتھ معاشی دہشت گردی؛ عمر ایوب کی زبانی

بانی پی ٹی آئی عمران خان اور چیئرمین بیرسٹر گوہر کو اپنے خط میں انہوں نے لکھا ہے کہ وہ بانی پی ٹی آئی کے شکر گزار ہیں کہ انہوں نے ان کا بطور سیکریٹری جنرل استعفیٰ منظور کیا۔ انہوں نے وضاحت کی ہے کہ اپوزیشن لیڈر کے عہدے کے لیے مکمل توجہ درکار ہے اور اس لیے وہ سمجھتے ہیں کہ وہ سیکریٹری جنرل کے عہدے کے ساتھ انصاف نہیں کر سکیں گے۔ تاہم، وہ تحریک انصاف کے لیے کارکن کے طور پر کام جاری رکھیں گے۔

انہوں نے اپنے خط میں لکھا ہے کہ سیکریٹری جنرل کا عہدہ ایسی شخصیت کو سونپا جائے جو پارٹی کی تنظیم نو کرے اور پارٹی کو جلد ہونے والے انتخابات کے لیے تیار کرے۔

واضح رہے کہ پاکستان تحریک انصاف میں اختلافات سامنے آرہے ہیں اور حال ہی میں شہریار آفریدی اور شاندانہ گلزار سمیت 21 ارکان قومی اسمبلی نے الگ گروپ بنانے کا عندیہ دیا تھا۔

مزید پڑھیں: سی پیک سے متعلق عمر ایوب کا آرمی چیف جنرل سے اہم مطالبہ

اس سے قبل شیر افضل مروت بھی پارٹی قیادت کی ’نااہلی‘ کے خلاف اپنا احتجاج ریکارڈ کرا چکے ہیں۔