صدر مملکت کا اقلیتوں کے نام پیغام

?️ 11 اگست 2024

سچ خبریں: صدر مملکت آصف علی زرداری نے کہا ہے کہ ہر پاکستانی کو مذہب، ذات، رنگ و نسل کی تفریق کے بغیر آزادی سے زندگی گزارنے کا حق حاصل ہے۔

اپنے پیغام میں صدر آصف علی زرداری نے کہا کہ پاکستان کی سماجی اور اقتصادی ترقی میں اقلیتوں کے کردار کو تسلیم کرنے کے لیے یہ دن منایا جاتا ہے۔

انہوں نے قائداعظم کے 11 اگست 1947 کے وعدے پر قائم رہنے کا عزم ظاہر کیا اور کہا کہ اقلیتوں کو آئینِ پاکستان کے تحت تمام سیاسی، معاشی، اور سماجی حقوق حاصل ہیں۔

یہ بھی پڑھیں: آئینِ پاکستان تمام اقلیتوں کے حقوق کی ضمانت دیتا ہے، صدر آصف زرداری کا ایسٹر کے موقع پر پیغام

صدر پاکستان نے کہا کہ اسلام اقلیتوں کے حقوق کے تحفظ کو مکمل طور پر تسلیم کرتا ہے۔

ہم نے سرکاری ملازمتوں میں اقلیتوں کے لیے 5 فیصد کوٹہ مختص کیا ہے، اور پارلیمنٹ کے دونوں ایوانوں میں بھی اقلیتوں کے لیے نشستیں مختص کی گئی ہیں۔

اقلیتی طلبہ کے لیے وظائف کی فراہمی، عبادت گاہوں کی مرمت اور دیکھ بھال کے لیے فنڈنگ کے اقدامات بھی کیے جا رہے ہیں۔

آصف علی زرداری نے کہا کہ پاکستان اقلیتوں کے مذہبی، سماجی، سیاسی، اور معاشی حقوق کا تحفظ یقینی بنانے کے لیے پرعزم ہے۔

ہر پاکستانی کو اپنی عقیدے کے مطابق زندگی گزارنے کا حق حاصل ہے، اور ہم اس حق کو برقرار رکھنے کے لیے کام کر رہے ہیں۔

انہوں نے مزید کہا کہ پاکستان اقلیتوں کے حقوق کے تحفظ اور انہیں مساوی مواقع فراہم کرنے کے لیے پرعزم ہے۔

انہوں نے کہا کہ مجھے یقین ہے کہ پاکستان کی اقلیتیں ملک کی ترقی میں اپنا مثبت کردار ادا کرتی رہیں گی۔

پاک فوج کے شعبہ تعلقات عامہ (آئی ایس پی آر) نے بھی سروسز چیفس کی جانب سے پاکستان کی اقلیتوں کو مبارکباد پیش کی۔

آئی ایس پی آر کے مطابق، قوم کی ترقی اور خوشحالی میں اقلیتی برادری کا کردار ناقابل فراموش ہے۔

آج کا دن تنوع، شمولیت، اور بقائے باہمی کے جذبے کی علامت ہے، جو ہماری عظیم قوم کا خاصہ ہے۔

مزید پڑھیں: بین الاقوامی مذہبی آزادی کی امریکی رپورٹ میں پاکستان سے متعلق دعوے مسترد

اقلیتی برادریاں ہمارے سماج کا اہم ترین اور ناگزیر حصہ ہیں۔

پاک فوج کے پیغام میں یہ بھی کہا گیا کہ اقلیتوں کے حقوق اور آزادیاں مقدس ہیں، جو آئین اور اسلام کے مطابق ہیں۔