اسرائیل جنگ کو روک رہا ہے یا بڑھا رہا ہے؟شیری رحمٰن کا ردعمل

?️ 1 اگست 2024

سچ خبریں: پیپلز پارٹی کی نائب صدر سینیٹر شیری رحمٰن نے حماس کے سیاسی سربراہ اسماعیل ہنیہ کی شہادت پر اپنے ردعمل کا اظہار کیا ہے۔

شیری رحمٰن نے اپنے بیان میں کہا کہ اسماعیل ہنیہ کو شہید کرکے اسرائیل نے یہ پیغام دیا ہے کہ اسے کوئی روک نہیں سکتا، اسرائیل جنگ کو روکنے کی بجائے اسے پھیلا رہا ہے۔

یہ بھی پڑھیں: اسرائیلی دہشت گردی کے خلاف امریکی عوام کا شدید احتجاج، امریکا کی جانب سے ہر طرح کی امداد بند کرنے کا مطالبہ

شیری رحمٰن کا کہنا تھا کہ تہران میں اس سنگین حملے سے ظاہر ہوتا ہے کہ اسرائیل مذاکرات اور جنگ بندی میں سنجیدہ نہیں ہے، یہ نہ صرف حماس بلکہ ایران کی خودمختاری پر بھی حملہ ہے۔

انہوں نے مزید کہا کہ اس اسرائیلی اقدام کی وجہ سے مشرق وسطیٰ کے حالات مزید خراب ہو سکتے ہیں۔

شیری رحمٰن کا کہنا تھا کہ مشرق وسطیٰ میں کشیدگی کے اثرات پوری دنیا پر مرتب ہوں گے۔

واضح رہے کہ فلسطین کی مزاحمتی تنظیم حماس کے سیاسی سربراہ اسماعیل ہنیہ ایران کے دارالحکومت تہران میں اسرائیلی حملے میں شہید ہوگئے ہیں۔

غیر ملکی میڈیا کے مطابق حماس نے اسماعیل ہنیہ کی شہادت کی تصدیق کر دی ہے۔ وہ ایرانی صدر کی تقریب حلف برداری میں شرکت کے لیے ایران گئے تھے۔

مزید پڑھیں: حماس کی اسرائیل کو شدید دھمکی، دہشت گردی بند نہ کی تو بھاری قیمت ادا کرنا پڑے گی

حماس نے بتایا ہے کہ تہران میں اسرائیلی حملے میں اسماعیل ہنیہ اور ان کا ایک محافظ شہید ہوئے ہیں۔ حماس کے سیاسی سربراہ پر حملے کے ذمہ داران کو سزا دی جائے گی۔