موجودہ حکومت کی حیات اور بانی پی ٹی آئی کی رہائی کے بارے میں فچ کی رپورٹ

?️ 18 جولائی 2024

سچ خبریں: بین الاقوامی کریڈٹ ریٹنگ ایجنسی فچ نے اپنی حالیہ رپورٹ میں کہا ہے کہ ن لیگ کی موجودہ حکومت مزید اٹھارہ ماہ تک برقرار رہے گی اور بانی پی ٹی آئی کی مستقبل قریب میں رہائی کے امکانات بھی بہت کم ہیں۔

بین الاقوامی کریڈٹ ریٹنگ ایجنسی فچ کا کہنا ہے کہ اگر موجودہ حکومت ختم ہوتی ہے تو اس کے بعد ٹیکنوکریٹس کا سیٹ اپ آنے کا امکان ہے، رپورٹ میں بانی پی ٹی آئی کی مستقبل قریب میں رہائی کے امکانات کو بھی کم بتایا گیا ہے۔

یہ بھی پڑھیں: موجودہ حکومت کتنی دیر چلے گی؟ اسد قیصر کی زبانی

تفصیلات کے مطابق، فچ نے پاکستان کے حوالے سے اپنی رپورٹ میں مزید پیش گوئیاں کی ہیں، جن میں بانی پی ٹی آئی کے مستقبل قریب میں قید میں رہنے کا ذکر ہے۔

رپورٹ کے مطابق، عام انتخابات میں جیتنے والے آزاد امیدواروں کو بانی پی ٹی آئی کی حمایت حاصل تھی۔ مستقبل میں ہونے والے مظاہرے ملک کی معاشی سرگرمیوں کو متاثر کر سکتے ہیں۔

فچ کی تازہ رپورٹ میں یہ بھی کہا گیا ہے کہ آئندہ چند سالوں میں زراعت کو سیلاب اور خشک سالی سے خطرات لاحق ہوں گے۔ بجٹ میں کیے گئے مشکل فیصلے آئی ایم ایف پروگرام کی راہ ہموار کر رہے ہیں۔ رواں مالی سال کے اختتام تک مہنگائی کی شرح کم ہو سکتی ہے اور شرح سود کے 14 فیصد تک آنے کا امکان ہے۔

رپورٹ میں مزید بتایا گیا ہے کہ حکومت پاکستان نے بجٹ میں مشکل ترین معاشی اہداف مقرر کیے ہیں تاکہ مالیاتی خسارے کو 7.4 فیصد سے کم کرکے 6.7 فیصد پر لایا جا سکے۔

مزید پڑھیں: موجودہ حکومت پر دوست ممالک اعتبار نہیں کرتے،شوکت ترین

فچ نے حکومت کے لیے خطرے کی گھنٹی بجاتے ہوئے پیش گوئی کی ہے کہ ن لیگ کی حکومت 18 ماہ تک برقرار رہے گی اور اس کے بعد ٹیکنوکریٹس کی حکومت بن سکتی ہے۔