گیلانی کی کامیابی یقینی بنانے میں مسلم لیگ ن اور جے یو آئی کا بڑا کردار

?️ 4 مارچ 2021

اسلام آباد {سچ خبریں} سابق صدر آصف علی زرداری نے سینیٹ انتخابات کے نتائج کے اعلان ہونے اور اس میں سابق وزیر اعظم یوسف رضا گیلانی کے کامیاب ہونے پر نواز شریف اور مولانا فضل الرحمٰن سے رابطہ کرکے دونوں کا شکریہ ادا کرتے ہوئے کہا کہ یوسف رضا گیلانی کی کامیابی یقینی بنانے میں مسلم لیگ ن اور جے یو آئی نے بڑا کردار ادا کیا۔

ذرائع کے مطابق مولانا فضل الرحمٰن نے کہا کہ یوسف رضا گیلانی ہمارے مشترکہ اور متفقہ امیدوار تھے، ان کی کامیابی حکومت مخالف اتحاد پاکستان ڈیموکریٹک موومنٹ (پی ڈی ایم) کی کامیابی ہے۔

مولانا فضل الرحمن، یوسف رضا گیلانی کی جیت نے ثابت کر دیا وزیراعظم اکثریت کھوچکے

ذرائع کے مطابق تینوں رہنماؤں نے وزیراعظم عمران خان سے فوری استعفے اور نئے الیکشن کا مطالبہ کیا۔

آصف زرداری کا کہنا ہے کہ ہم نے حکمت عملی سے حکومتی طاقتور امیدوار کو شکست دی ہے۔

ذرائع کے مطابق نواز شریف نے کہا کہ حکومت کے اپنے اراکین ہم سے رابطے میں ہیں وہ ان سے تنگ ہیں۔

مولانا فضل الرحمٰن نے کہا کہ اسی اتحاد سے عمران خان کو جلد اقتدار سے رخصت کریں گے۔

یوسف رضا گیلانی کی ہار پکی ہے:وزیر داخلہ

ذرائع کے مطابق اس موقع پر تینوں رہنماؤں نے پی ڈی ایم کی مستقبل کی حکمت عملی اور لانگ مارچ کی تیاریوں پر بھی بات چیت بھی کی۔

آصف زرداری نے کہا کہ اتحادیوں کی مشاورت سے چیئرمین سینیٹ کے امیدوار کا فیصلہ کرینگے۔