2028 تک ریکوڈک منصوبے کو ریلوے نیٹ ورک سے منسلک کیا جائے، وزیراعظم کی ہدایت

?️ 17 جون 2025

اسلام آباد: (سچ خبریں) وزیر اعظم پاکستان شہباز شریف نے پاکستان ریلویز کو ملکی معیشت اور مواصلات میں ریڑھ کی ہڈی کی حیثیت قرار دیتے ہوئے 2028 تک ریکوڈک کو ریلوے لائن نیٹ ورک سے منسلک کرنے کی ہدایت کر دی۔

سرکاری خبر رساں ایجنسی ’اے پی پی‘ کی رپورٹ کے مطابق شہباز شریف کی زیر صدارت پاکستان ریلویز کی اپ گریڈیشن اور اس کی ریکوڈک تک توسیع سے متعلق اجلاس ہوا۔ اجلاس کے شرکا سے اظہار خیال کرتے ہوئے وزیراعظم نے کہا کہ پاکستان میں ریلوے نقل و حمل کا سستا، تیز اور ماحول دوست ذریعہ ہے۔

وزیر اعظم نے کہا کہ ریکوڈک کو ریلوے نیٹ ورک سے منسلک کرنے سے بلوچستان کے مائنز اینڈ منرلز کے شعبے کی ترقی اور علاقے کے عوام کے لیے روزگار کے نئے مواقع پیدا ہوں گے۔

پی ایم آفس سے جاری بیان کے مطابق اجلاس میں مستقبل کی کارگو اور نقل و حمل کی ضروریات کے پیش نظر پاکستان ریلویز کی ترقی بشمول ایم ایل ون اور ایم ایل 3 کی اپ گریڈیشن پر شرکا کو بریفنگ دی گئی۔

وزیراعظم نے ریلوے کی اپ گریڈیشن اور ترقی کے لیے فنانسنگ کے حوالے سے بین الوزارتی کمیٹی تشکیل دینے کی ہدایت کرتے ہوئے کہا کہ کمیٹی پاکستان ریلویز کی ترقی اور اس کی ریکو ڈک تک توسیع کے لیے درکار فنانسنگ کے حوالے سے ٹھوس تجاویز پیش کرے۔

اجلاس میں نائب وزیراعظم و وزیر خارجہ محمد اسحٰق ڈار، وزیر دفاع خواجہ محمد آصف، وزیر اقتصادی امور احد خان چیمہ، وزیر بحری امور جنید انور چوہدری، وزیر ریلویز حنیف عباسی، وزیر مملکت برائے ریلویز بلال اظہر کیانی، معاون خصوصی طارق فاطمی اور دیگر اعلیٰ سرکاری حکام شریک تھے۔