یوسف رضا گیلانی کی ہار پکی ہے:وزیر داخلہ

?️ 3 مارچ 2021

اسلام آباد (سچ خبریں) اسلام آباد میں پارلیمنٹ ہاؤس آمد کے موقع پر میڈیا سے گفتگو کرتے ہوئے انہوں نے وزیر داخلہ شیخ رشید احمد نے کہا ہے کہ وہ سینیٹ انتخاب میں حفیظ شیخ کی کامیابی کے لیے 120 فیصد پرامید ہیں اور حفیظ شیخ عمران خان کا امیدوار ہے اور وہ جیتنے جارہا ہے جبکہ اپوزیشن کے امید وار یوسف رضا گیلانی کی ہار پکی ہے انہوں نے کہا کہ الیکشن نزدیک ہوتے ہیں تو ایسا ہوتا ہے کہ لوگوں کے مسائل زندہ ہوجاتے ہیں لیکن اس سے مسائل حل ہوجاتے ہیں۔

انہوں نے کہا کہ آج جمہوریت کا دن ہے اب ہمیں الیکشن اصلاحات کی طرف جانا چاہیے اور جو جمہوریت کی توانائی کے لیے الیکشن عمل میں رکاوٹوں کو دور کرنا چاہیے، پنجاب میں تو ہم نے الیکشن پر بڑی آسانی سے ٹوکرا رکھ دیا جبکہ باقی جگہ الیکشن ہورہے ہیں۔

بات کو آگے بڑھاتے ہوئے انہوں نے کہا کہ آج ’مدر آف دی الیکشن‘ ہورہے ہیں اور عمران خان کا اُمیدوار شیخ حفیظ جیتنے جارہا ہے۔

وزیر داخلہ نے کہا کہ بلند حوصلے ہیں اور 5 بجے ہم جیتیں گے اور کل سے پی ڈی ایم کی سیاست کمزور پڑے گی، ساتھ ہی انہوں نے اپوزیشن اتحاد سے درخواست کی کہ 26 تاریخ کے اپنے لانگ مارچ کو آگے لے جائیں۔

انہوں نے کہا کہ یہاں ایک گرینڈ مارچ ہونے جارہا ہے، 23 تاریخ کو یہ مارچ ہے اور 24 کو ان کا آرام کا دن ہوتا ہے جبکہ 25 اور 26 کو انہوں نے واپس جانا ہے۔

شیخ رشید احمد کا کہنا تھا کہ اسلام آباد میں اب ہمیں سکون بھی چاہیے، جمہوریت کی توانائی اور طاقت کے لیے سوچنا چاہیے اور حفیظ شیخ کی جیت جمہوریت کی طاقت اور بڑائی ہوگی۔

دوسری جانب وفاقی وزیر ترقی و منصوبہ بندی اسد عمر کا کہنا تھا کہ سینیٹ انتخابات میں ووٹوں کی خرید و فروخت کا کھیل 30 سال سے کھیلا جارہا ہے۔

پارلیمنٹ ہاؤس میں میڈیا سے غیررسمی گفتگو میں انہوں نے کہا کہ یہ کھیل کل سے نہیں ہورہا 30 سال سے کھیلا جارہا ہے، فون کیمرے آنے کی وجہ سے پورا پاکستان یہ ویڈیو دیکھ رہا ہے۔

انہوں نے کہا کہ ’گھناؤنا کھیل ہی ان کی سیاست ہے، حرام کا پیسہ کماؤ اس سے نشستیں خریدوں اور اس کے بعد طاقت میں آکر مزید حرام کا پیسہ کماؤ، یہ سیاست کا وقت ختم ہوچکا ہے، وہ جو مرضی کرلیں’۔

ایک سوال کے جواب میں اسد عمر کا کہنا تھا کہ یہ سب نے دیکھا کہ ہمارے ایک ایم پی او کو اسمبلی کے فلور سے گھسیٹ کر لے جارہے ہیں اور وہ ویڈیو پر کہہ رہا ہے کہ پیپلزپارٹی مجھے اغوا کر رہی ہے جبکہ میں الیکشن کمیشن پر حیران ہوں کہ وہ کیا کر رہا ہے۔

واضح رہے کہ ایوان بالا کی 37 نشستوں پر آج انتخابات کے لیے سندھ، خیبرپختونخوا، بلوچستان اور اسلام آباد سے مجموعی طور پر 78 امیدوار میدان میں ہیں جبکہ پنجاب سے تمام امیدوار گزشتہ ماہ دیگر امیدواروں کی جانب سے کاغذات نامزدگی واپس لینے یا نااہل ہونے کے بعد بلامقابلہ منتخب ہوچکے تھے۔

اسلام آباد سے 2، سندھ سے 11 جبکہ خیبرپختونخوا اور بلوچستان سے 12، 12 سینیٹرز کی نشستوں پر مقابلہ ہورہا ہے۔تاہم اس مقابلے میں کانٹے کا مقابلہ اسلام آباد سے سینیٹ کی نشست پر متوقع ہے جہاں حکومت کی طرف سے حفیظ شیخ اور اپوزیشن کی جانب سے یوسف رضا گیلانی امیدوار ہیں۔