گلگت بلتستان میں عام انتخابات 2026 کا شیڈول جاری کردیا گیا

?️ 12 دسمبر 2025

گلگت (سچ خبریں) الیکشن کمیشن گلگت بلتستان (election commission of gb) نے عام انتخابات 2026 کا شیڈول جاری کر دیا، جس کے مطابق پولنگ 24 جنوری 2026 کو ہوگی۔

الیکشن کمیشن کے مطابق کاغذات نامزدگی 15 سے 22 دسمبر تک جمع ہوں گے،امیدواروں کی ابتدائی فہرست 23 دسمبر کو جاری ہوگی، اسکروٹنی کی آخری تاریخ 30 دسمبر مقرر کی گئی ہے۔ اپیلیں دائر کرنے کی آخری تاریخ 3 جنوری 2026 ہوگی، اپیلٹ ٹربیونل 10 جنوری تک فیصلے سنائے گا، امیدواروں کی نظرثانی شدہ فہرست 11 جنوری کو جاری ہوگی، امیدوار دستبرداری اور حتمی فہرست 12 جنوری کو شائع ہوگی، انتخابی نشانات 13 جنوری کو الاٹ کیے جائیں گے۔ الیکشن کمیشن جی بی نے انتخابات 2026 کے لیے ڈی آر اوز کا تقرر بھی کردیا، تمام اضلاع میں ڈسٹرکٹ ریٹرننگ افسران تعینات کردئیے گئے۔

گلگت میں امیر حمزہ، اسکردو میں خورشید احمد،دیامر میں سہیل احمد خان اور غذر میں لقمان حکیم ڈسٹرکٹ ریٹرننگ افسر ہونگے۔ اسی طرح منہاج علی راجہ استور ،نظام الدین ہنزہ اور محسن حسین نگر میں ڈی آر او تعینات کئے گئے ہیں، گانچھے میں محمد اسحاق، کھرمنگ میں محمد شریف ایڈیشنل سیشنز جج بطورڈی آر او ہونگے۔

شگر میں منظور حسین ڈسٹرکٹ ریٹرننگ افسر تعینات کئے گئے ہیں، الیکشن کمیشن کا کہنا ہے کہ انتخابی عمل شفاف، منظم اور قانون کے مطابق ہوگا، تمام اضلاع میں انتخابی انتظامات مزید تیز کر دیے گئے ہیں۔