کیڈٹ کالج وانا پر حملہ بارے وزارت اطلاعات و نشریات کا بیان جاری

?️ 13 نومبر 2025

اسلام آباد (سچ خبریں) کیڈٹ کالج وانا پر دہشت گردوں کی جانب سے حملہ بارے وزارت اطلاعات و نشریات نے بیان جاری کر دیا۔

وزارت اطلاعات و نشریات نے سوشل میڈیا سائٹ ایکس پر اپنے بیان میں کہا کہ کیڈٹ کالج وانا پر حملے کی منصوبہ بندی اور کنٹرول افغانستان سے کیا گیا تھا۔ بیان میں واضح کیا گیا کہ حملے کی منصوبہ بندی افغانستان میں خارجی زاہد نے کی اور اس کی حتمی منظوری خارجی نورولی محسود نے دی تھی۔

وزارت اطلاعات و نشریات کے بیان سے واضح ہے کہ حملے میں شامل تمام افراد افغان تھے اور حملے کے تانے بانے افغانستان میں موجود خارجی نور ولی محسود سے ملتے ہیں۔ وانا میں حملے کے لیے سازوسامان امریکی ساخت کا تھا جو افغانستان سے لایا گیا، خارجی نور ولی محسود کے حکم پر ٹی ٹی پی سے حملے کی ذمہ داری ہٹا کر "جیش الہند” نامی تنظیم پر ڈال دی۔

وزارت اطلاعات و نشریات کے مطابق افغان طالبان پاکستان اور دوست ممالک کے اعتراض کے پیش نظر فتنہ الخوارج پر حملوں کی ذمہ داری قبول نہ کرنے کے لیے دباؤ ڈالتے ہیں۔ کیڈٹ کالج وانا پر حملے کا مقصد بھارتی ایجنسی "را” کے مطالبے پر پاکستان میں سکیورٹی خدشات کو بڑھانا تھا۔

وزارت اطلاعات و نشریات کے مطابق حملے میں ہلاک افغان دہشت گردوں کی شناخت سے افغانستان سے ہونے والی دہشت گردی واضح طور پر ابھارتی ہے۔ واضح رہے کہ اس سے قبل وزیر داخلہ نے بھی بیان جاری کیا تھا کہ اسلام آباد کچہری میں خودکش دھماکہ کرنے والا عثمان عرف قاری کا تعلق بھی افغانستان سے ہے۔