کویت حیدرآباد میں کورونا وائرس کے علاج کے لئے ہسپتال قائم کرے گا:وزیر اعلی سندھ

?️ 6 اپریل 2021

کراچی (سچ خبریں) وزیر اعلیٰ سندھ مراد علی شاہ نے کہا ہےکہ کویت  حیدرآباد میں کورونا وائرس کے علاج کے لئے ہسپتال قائم کرے گا، کویتی قونصل جنرل سلیم یوسف الحمدان نے وزیراعلیٰ سندھ سے ملاقات میں کورونا مریضوں کیلئے اسپتال بنانے کی پیش کش کردی۔

تفصیلات کے مطابق وزیراعلیٰ سندھ مراد علی شاہ سے کویت کے کراچی میں مقرر قونصل جنرل کی ملاقات ہوئی ، ملاقات میں دوطرفہ تعلقات اورباہمی دلچسپی کےامورپربات چیت کی گئی۔وزیراعلیٰ سندھ مراد علی شاہ نے کہا کہ کویت ہمارابرادراسلامی ملک ہے، ہم کویت کے ساتھ تعلقات کوعزت کی نگاہ سے دیکھتےہیں۔

مراد علی شاہ کا کہنا تھا کہ شہیدبھٹوکےزمانےمیں کویت نےہوٹل انڈسٹری میں سرمایہ کاری کی، سندھ کےکافی نوجوان شہیدذوالفقاربھٹوکےزمانےسےکویت میں کام کررہےہیں۔

ملاقات میں وزیراعلیٰ سندھ نے کویت کو کول انرجی میں سرمایہ کاری کی دعوت دی جبکہ قونصل جنرل سلیم یوسف الحمدان نے کورونا مریضوں کیلئے اسپتال بنانے کی پیش کش کی۔مرادعلی شاہ نے کہا کہ کویت حیدرآباد میں کوروناوائرس کے علاج کیلئے اسپتال قائم کرے گا۔

واضح رہے کہ گزشتہ 24 گھنٹوں کے دوران ملک بھر میں کورونا کے 43362 ٹیسٹ کیے گئے جن میں سے 4323 افراد میں کورونا وائرس کی تصدیق ہوئی جب کہ وائرس سے 43 ہلاکتیں ہوئیں۔سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 9.9 فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 14821 ہوگئی اور مجموعی کیسز 6 لاکھ 92231 تک جاپہنچے ہیں جب کہ فعال کیسز کی تعداد 61450 ہے۔