کورونا کیسز میں اضافے کی وجہ سے مزید علاقوں میں لاک ڈاون لگایا جائے گا

?️ 12 اگست 2021

لاہور(سچ خبریں)وزیر صحت پنجاب ڈاکٹر یاسمین راشد نے کہاہے کہ کورونا کیسز کی روک تھام کے لیے صوبے کے زیادہ متاثرہ علاقوں میں لاک ڈاﺅن ضروری ہے یاسمین راشد نے اپنے ایک بیان میں بتایا کہ ملک میں اب یومیہ ساڑھے 5 لاکھ افراد کو ویکسین لگائی جارہی ہے ہماری کوشش ہے کہ کوئی ویکسین سے محروم نہ رہے.

انہوں نے کہا کہ ڈیلٹا ویرینٹ کے کیسزمیں صرف 10 فیصد وہ ہیں جن کی ویکسین ہوچکی ہے ادھر وفاقی وزیر اسد عمر نے ٹوئٹر پر ایک پیغام میں کہاہے کہ آزاد کشمیر میں اس وقت کورونا مثبت کیسز کی شرح 25 سے 30 فیصد کے درمیان چل رہی ہے.

انہوں نے کہا کہ آزاد کشمیر میں کورونا پھیلاﺅمیں انتخابات نے ایک سپر اسپریڈر کے طور پر کام کیا ہے آزادکشمیر کے انتخابات کو چند ماہ کے لیے ملتوی کر نے کی سفارش کرتے ہوئے ایک خصوصی ویکسینیشن مہم چلانے کا کہا تھالیکن آزاد کشمیر انتخاب ملتوی کرنے اور ویکسین مہم پر اتفاق نہیں کیا گیا.

انہوں نے کہا کہ انتخابات کے بعد سے آزاد کشمیر میں کورونا مثبت کیسز کی شرح میں اضافہ ہوا کیونکہ ہم انتخابات موخرکرنے کے لیے تیار تھے مگر پیپلزپارٹی اور نون لیگ نے ایسا کرنے سے انکار کردیا تھا . وفاقی وزیرنے کہا کہ دو ہفتے پہلے بلاول زرداری دھمکی دے رہے تھے کہ اگر کراچی میں مزید کورونا پھیلتا ہے تو ذمہ دار وزیر اعظم اور وزراءہوں گئے اب پی ڈی ایم نے کراچی میں اسی ماہ جلسہ کرنے کا اعلان کیا ہے.

انہوں نے کہا کہ افسوس کی بات ہے گزشتہ ایک سال میں کورونا ایس او پیز کی بدترین خلاف ورزیاں سیاستدانوں کی طرف سے آئی ہیں وفاقی وزیر اسد عمر نے کہا کہ پاکستان میں اب تک کورونا ویکسین کی چار کروڑ خوراکیں لگائی جا چکی ہیں. انہوں نے بتایاکہ آخری ایک کروڑ ویکسین کی خوراکیں صرف 9 دن میں لگائی گئی ہیں اسد عمر نے عوام سے ایک بار پھر کورونا ویکسین لگوانے کی اپیل کرتے ہوئے کہا ہے کہ پاکستان کو محفوظ بنائیں کے لیے آئیں ویکسین لگوائیں.