پاکستان کو ماحولیاتی تبدیلی سے نمٹنے کے لیے انصاف پسند تعاون کی ضرورت ہے: راجہ پرویز اشرف

?️ 5 اکتوبر 2022

اسلام آباد: (سچ خبریں) سپیکر قومی اسمبلی راجہ پرویز اشرف نے کہا ہے کہ پاکستان کو ماحولیاتی تبدیلی سے نمٹنے کے لیے انصاف پسند تعاون کی ضرورت ہے۔ ترقی یافتہ ممالک کو ماحولیاتی تبدیلی کے اثرات سے بہتر طور پر نمٹنے کے لیے پاکستان جیسے موسمیاتی خطرات سے دوچار ممالک کو فوری اور منصفانہ مالی امداد دینی چاہیے۔

پاکستان میں موسمیاتی تباہی عالمی برادری کے لیے ایک یاد دہانی ہے کہ وہ اس صورتحا کے تناظر میں فوری اور موثر اقدامات کرے۔ان خیالات کا اظہارانہوں نے بدھ کو پارلیمنٹ ہائوس میں بین الپارلیمانی یونین (آئی پی یو) کے بارہ سے زائد ممالک کے گروپ سے ملاقات میں کیا۔ میٹنگ کا اہتمام 11 سے 15 اکتوبر 2022 تک روانڈا میں ہونے والی 145ویں آئی پی یو اسمبلی میں قرارداد کی منظوری کے ذریعے عالمی موسمیاتی فنڈ کی اسمبلی کی تجویز کے لیے ترقی یافتہ ممالک کی حمایت حاصل کرنے کے لیے کیا گیا تھا۔

 راجہ پرویز اشرف  نے اس بات پر زور دیا کہ پاکستان میں ماحولیاتی تباہی اتنی بڑی اور ناقابل تصور تھی کہ جو کچھ ہم دیکھ رہے ہیں یہ کچھ بھی نہیں ہے ۔ سیلابی پانی کی ظالمانہ لہریں لاکھوں مردوں، عورتوں اور بچوں کو بہا لے گئیں۔ تباہ شدہ عمارتیں، سڑکیں فصلیں اور مویشی بہہ گئے۔ پاکستان کی تاریخ میں انسانی آنکھ نے اتنی بڑی آفت نہیں دیکھی۔ انہوں نے کہا کہ موسمیاتی تبدیلی ایک بڑا خطرہ ہے، خاص طور پر ان ترقی پذیر ممالک کے لیے جو کہ موسمیاتی تبدیلیوں کے لیے انتہائی حساس ہیں۔

سیلاب، خشک سالی، گرمی کی وجہ سے گلیشیئرز کے پگھلنے اور سمندری طوفانوں کی صورت میں ہمیں پریشانی کا سامنا ہے۔ کوئی بھی فطری عمل کو کالعدم نہیں کر سکتا لیکن انسانوں کی طرف سے ہونے والی تباہی کو محدود کرنے کی کوشش کر سکتا ہے۔راجہ پرویزاشرف نے کہا کہ ملک میں حالیہ موسمیاتی تبدیلی کے پس منظر میں اسمبلی نے آئندہ آئی پی یو اسمبلی میں ایک ہنگامی آئٹم کی تجویز پیش کی تھی۔

تجویز میں بین الاقوامی برادری پر زور دیا گیا کہ وہ موجودہ ہنگامی امداد سے آگے اپنی توجہ مرکوز رکھے، درمیانی اور طویل مدتی بحالی اور خطرات میں کمی کی کوششوں کے ساتھ ساتھ حکومت پاکستان کی قیادت میں موافقت کے منصوبے کی حمایت کے لیے سیاسی عزم کو برقرار رکھے۔ ہم نے اقوام متحدہ کے زیراہتمام ایک بین الاقوامی کانفرنس کے انعقاد کی بھی سفارش کی ہے تاکہ ماحولیاتی تباہ کاریوں سے متاثرہ ممالک میں موسمیاتی تبدیلی سے وابستہ نقصانات سے نمٹنے کے لیے ایک فنڈ کے قیام پر تبادلہ خیال کیا جا سکے۔

سپیکر نے سفارت کاروں پر زور دیا کہ وہ ترقی پذیر دنیا میں موسمیاتی چیلنجوں سے نمٹنے کے لیے تعاون اور کارروائی کے لیے اپنی متعلقہ حکومتوں اور پارلیمانوں کو پیغام دیں۔ اجلاس میں بوسنیا اور ہرزیگووینا، بلغاریہ، کینیڈا، قبرص، جمہوریہ چیک، فرانس، ہنگری، پولینڈ، پرتگال، رومانیہ، سپین، سویڈن، سوئٹزرلینڈ، ترکی، ناروے، برطانیہ اور اٹلی کے مندوبین نے شرکت کی۔