پاکستان: کورونا سے مزید 73 افراد جان کی بازی ہار گئے

?️ 29 مئی 2021

اسلام آباد(سچ خبریں) پاکستان میں عالمی وباء کورونا وائرس سے مزید 73 افراد جان کی بازی ہار گئے، گزشتہ چوبیس گھنٹوں میں مزید 2455 نئے مثبت کیسز رپورٹ ہوئے، تاہم  ملک بھر میں کورونا کے فعال مریضوں کی تعداد58 ہزار 857 ہے ، جن میں سے 4 ہزار سے زائد مریضوں کی حالت تشویشناک بتائی گئی ہے۔

نیشنل کمانڈ اینڈ آپریشن سینٹر کی جانب سے جاری کردہ تازہ ترین سرکاری اعداد و شمار کے مطابق گزشتہ 24 گھنٹوں کے دوران 55 ہزار 442 کورونا ٹیسٹ کیے گئے اس دوران ملک بھر میں مزید 2 ہزار 455 مثبت کیسز رپورٹ ہوئے ہیں ، اس طرح پاکستان میں کورونا کے مصدقہ مریضوں کی تعداد 916,239 ہوگئی ہے۔

بتایا گیا ہے کہ پاکستان میں اب تک صوبہ سندھ میں کورونا کے 3 لاکھ 15 ہزار 410 مریض سامنے آچکے ہیں ، صوبہ پنجاب میں یہ تعداد 3 لاکھ 38 ہزار 377 ہے ، صوبہ خیبر پختونخوا میں ایک لاکھ 31 ہزار 775، اسلام آباد میں 81 ہزار 007، صوبہ بلوچستان میں یہ تعداد 25 ہزار 001 رہی ، جب کہ آزاد کشمیر میں 19 ہزار 108 اور گلگت بلتستان میں اب تک 5 ہزار 561 افراد میں کورونا وائرس کی تشخیص ہوچکی ہے۔

این سی او سی کے سرکاری اعداد و شمار کے مطابق گزشتہ 24 گھنٹوں کے دوران ملک بھر میں کورونا سے مزید 73 افراد جاں بحق ہوگئے ہیں جس کے بعد اب اس وبا سے جاں بحق ہونے والے افراد کی تعداد مجموعی طور پر 20 ہزار 680 ہوگئی ہے۔

کورونا کی وجہ سے پاکستان میں سب سے زیادہ اموات صوبہ پنجاب میں ہوئی ہیں جہاں اب تک 9 ہزار 960 افراد جان کی بازی ہار چکے ہیں جب کہ سندھ میں 5 ہزار 3 افراد کورونا سے انتقال کرگئے ، صوبہ خیبرپختونخوا میں 4 ہزار 43، وفاقی دارالحکومت اسلام آباد میں 755 اور گلگت بلتستان 107، جب کہ صوبہ بلوچستان میں 273 اور آزاد کشمیر میں 539 افراد جان کی بازی ہار چکے ہیں۔