پاکستان میں بھی پانی کے عالمی دن کا انعقاد کیا گیا

?️ 22 مارچ 2021

کراچی(سچ خبریں) 22 مارچ کو پانی کا عالمی دن منایاجاتا ہے اس حوالے سے پاکستان میں بھی عالمی دن کی تقریبات کا انعقاد کیا گیا ،پاکستان بھی دنیا کے ان 17 ممالک میں شامل ہے جو پانی کی قلت کا شکار ہیں،ماہرین کے مطابق پاکستان میں قلت آب کا مسئلہ شدید تر ہو رہا ہے اور سال2025تک ملک خشک سالی کا شکار ہو سکتا ہے۔

تفصیلات کے مطابق اس دن کو منانے کا آغازسال1993سے کیاگیا تھا،سال1992میںبرازیل کے شہر ریو ڈی جنیرونے اقوام متحدہ کی ماحول اور ترقی کے عنوان سے منعقد کانفرنس میں پانی کاعالمی دن منانے کی سفارشکی تھی۔رواں برس یہ دن ویلیونگ واٹر کے مرکزی خیال کے تحت منایاگیا۔

اقوام متحدہ کے مطابق دنیا میں اس وقت 7 ارب افراد کو روزانہ پانی اور خوراک کی ضرورت ہوتی ہے جن کی تعدادسال 2050 تک بڑھ کر 9 ارب ہونے کی توقع ہے۔اس وقت دنیا بھر میں 1 ارب 10 کروڑ افراد پینے کے صاف پانی سے محروم اور 2 ارب 70 کروڑ افراد پانی کی قلت کا شکار ہیں۔پاکستان بھی دنیا کے ان 17 ممالک میں شامل ہے جو پانی کی قلت کا شکار ہیں۔

سرکاری اعداد و شمار کے مطابق جب پاکستان وجود میں آیا تو اس وقت ہر شہری کے لیے 5 ہزار 6 سو کیوبک میٹر پانی تھا جو اب کم ہو کر 1 ہزار کیوبک میٹر رہ گیا ہے اور سنہ 2025 تک 800 کیوبک میٹر رہ جائے گا۔پاکستان میں پانی کی مقدار میں کمی کے علاوہ اس کا معیار بھی انتہائی پست ہے۔

ملک کی 85 فیصد آبادی پینے کے صاف پانی سے محروم ہے، ملک کا 92 فیصد سیوریج کا پانی براہ راست دریاں اور نہروں میں شامل ہوجاتا ہے۔اس آمیزش کی وجہ سے 5 کروڑ افراد سنکھیا کے زہریلے اثرات کی زد میں ہیں۔اس گندے پانی کی وجہ سے ہر سال 52 ہزار بچے ہیضہ، اسہال اور دیگر بیماریوں سے جاں بحق ہوتے ہیں۔ اس وقت معیشت کا ڈیڑھ فیصد حصہ اسپتالوں میں پانی سے متعلقہ بیماریوں کے علاج پر خرچ ہو رہا ہے۔

ماہرین کے مطابق پاکستان میں قلت آب کا مسئلہ شدید تر ہو رہا ہے اور سال2025تک ملک خشک سالی کا شکار ہو سکتا ہے۔ ماہرین کے مطابق زیر زمین پانی کے استعمال کی پالیسی بنانے، زیر زمین پانی کے ذخائر محفوظ بنانے، ڈیموں کی تعمیر اور پانی کے ضیاع کو روکے جانے کی سخت ضرورت ہے۔