پاکستان اسٹاک ایکسچینج میں تیزی کا رجحان برقرار، انڈیکس نئی بلند ترین پر سطح پر پہنچ گیا

?️ 2 جولائی 2025

کراچی: (سچ خبریں) نئے مالی سال کے دوسرے روز بھی پاکستان اسٹاک ایکسچینج میں تیزی کا رجحان برقرار رہا، اور 2144 پوائنٹس کے اضافے سے بینچ مارک ہنڈرڈ انڈیکس تاریخ کی نئی بلند ترین سطح پر پہنچ گیا۔

پی ایس ایکس کی ویب سائٹ کے مطابق بدھ کو کاروباری ہفتے کے تیسرے اور مالی سال کے دوسرے روز کاروبار کے آغاز کے ساتھ ہی مارکیٹ میں تیزی کا رجحان برقرار رہا، اور ہنڈریڈ انڈیکس 2144 پوائنٹس کے اضافے کے ساتھ ایک لاکھ 30 ہزار 344 پوائنٹس پر بند ہوا۔

منگل کو مالی سال کے پہلے روز بھی مارکیٹ 2 ہزار 572 پوائنٹس یا 2.05 فیصد اضافے سے ایک لاکھ 28 ہزار 199 پوائنٹس کی بلند ترین سطح پر بند ہوئی تھی۔

چیز سیکیورٹیز کے ڈائریکٹر ریسرچ یوسف ایم فاروق نے خطے میں جغرافیائی کشیدگی میں کمی اور شرحِ سود میں بتدریج کمی کے امکانات کے ساتھ ساتھ معاشی استحکام میں بہتری کو اسٹاک مارکیٹ میں اضافے کی وجہ قرار دیا تھا۔

انہوں نے کہا کہ سرمایہ کار ایک مضبوط کارپوریٹ نتائج کے حامل سیزن کی توقع کر رہے ہیں اور مارکیٹ کے پرائس ٹو ارننگ تناسب کو معمول کی سطح پر لے جا رہے ہیں۔

یوسف فاروق کے مطابق مارکیٹ تیزی کے رجحان کے دوسرے مرحلے میں داخل ہو چکی تھی، جو کہ عوامی شمولیت میں اضافے اور وسیع پیمانے پر مختلف اسٹاکس میں تیزی سے ظاہر ہوتا ہے۔

وزیر اعظم شہباز شریف نے اسٹاک ایکسچینج کے بلند ترین سطح عبور کرنے پر اظہار اطمینان کرتے ہوئے کہا تھا کہ نیا مالی سال اچھی خبر اور معاشی میدان میں ایک اہم پیشرفت سے شروع ہوا، 100 انڈیکس کا بلند ترین سطح پرپہنچنا حکومتی پالیسیوں پر اعتماد کا مظہر ہے۔