وزیر خارجہ اسحاق ڈار امریکہ کے دورے پر روانہ

?️ 19 جولائی 2025

اسلام آباد (سچ خبریں) نائب وزیراعظم و وزیر خارجہ اسحاق ڈار امریکہ کے دورے پر روانہ ہو گئے۔

وزارت خارجہ کے ذرائع کے مطابق نائب وزیر اعظم و وزیر خارجہ اسحاق ڈار امریکہ کے اہم دورے پر روانہ ہو گئے ہیں۔ وہ آج رات لندن میں قیام کریں گے اور کل نیویارک روانہ ہوں گے۔

ذرائع کے مطابق اسحاق ڈار 22 جولائی کو اقوام متحدہ کی سلامتی کونسل کے اجلاس میں شرکت کریں گے۔ جہاں وہ خطے کی بدلتی ہوئی صورتحال پر پاکستان کا مؤقف پیش کریں گے۔

اسی طرح دورے کے دوران اسحاق ڈار کی اقوام متحدہ کے سیکرٹری جنرل انتونیو گوتیرس سے بھی اہم ملاقات بھی متوقع ہے۔ جس میں عالمی، علاقائی اور سیکیورٹی امور پر تبادلہ خیال کیا جائے گا۔

نائب وزیر اعظم کی امریکی وزیر خارجہ سے بھی اگلے ہفتے ملاقات کا امکان ہے۔ جس میں پاک بھارت حالیہ کشیدگی کے تناظر میں جنوبی ایشیا میں سیکیورٹی اور امن و استحکام پر تفصیلی مشاورت متوقع ہے۔

اس دورے کا مقصد عالمی فورمز پر پاکستان کے مؤقف کو مؤثر انداز میں اجاگر کرنا اور سفارتی سطح پر اہم روابط کو مضبوط بنانا ہے۔